პოლიციისა და შრომის ინსპექციის შემდეგ, ზურაბ ჯაფარიძის ბარში მუნიციპალური ინსპექცია მივიდა. მერიის სამსახურის თანამშრომლების განცხადებით, მათთან მეზობლებისგან ხმამაღალი მუსიკის გამო ზარი შევიდა და ახლა დეციბალები უნდა გაზომონ.

ამ წუთებში ბარში სწორედ ეს პროცედურა მიმდინარეობს. On.ge-ს ჟურნალისტები რჩებიან ადგილზე და ინფორმაციას განახლებად რეჟიმში მოგაწვდით.

განახლება: მუნიციპალურმა ინსპექციამ ტერიტორია უკვე დატოვა. უცნობია, რა შედეგი აჩვენა დეციბალების გაზომვამ.

მუნიციპალური ინსპექციის მისვლამდე რამდენიმე წუთით ადრე, ზურაბ ჯაფარიძე ბარის გახსნისთვის 2 000 ლარით დააჯარიმეს. განმეორების შემთხვევაში, მას სისხლისსამართლებრივი პასუხისმგებლობა დაეკისრება. ადგილზე შრომის ინსპექცია და პოლიცია იყვნენ მისულები.

გირჩი — მეტი თავისუფლების ლიდერმა, ზურაბ ჯაფარიძემ აღმაშენებლის გამზირზე ბარი გახსნა. მისი თქმით, ამ ფორმით ქვეყანაში დაწესებულ შეზღუდვებს აპროტესტებს. ჯაფარიძემ აღნიშნა, რომ აპირებს ბარი სხვა დღეებშიც ამუშაოს და მხოლოდ იმ შემთხვევაში დაიკეტება, თუ მას დააკავებენ.

მისი თქმით, ეს არის პოლიტიკური დაუმორჩილებლობის აქტი და არღვევს იმ რეგულაციებს, რომლებიც, მისი აზრით, არაკონსტიტუციურია და ადამიანებს წაართვა სიცოცხლის უფლება.

ამ ეტაპისთვის თბილისში ბარ-რესტორნების მუშაობა კვლავ აკრძალულია. რესტორნებისთვის ღია სივრცეში მუშაობა მხოლოდ 15 თებერვლიდან იქნება ნებადართული, შაბათ-კვირის და კომენდანტის საათის გამოკლებით.

მიუხედავად იმისა, რომ შეზღუდვების ნაწილი იხსნება, სხვადასხვა ბიზნესის წარმომადგენლები აცხადებენ, რომ ეს არასაკმარისია და მკაცრი რეგულაციების ფარგლებში შეზღუდვების მოხსნას ითხოვენ. აღნიშნული მოთხოვნებით თბილისში არაერთი აქცია ჩატარდა.