რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, სახელმწიფოს არ აქვს პასუხისმგებლობა დაეხმაროს ბიზნესს, რომელიც უპასუხისმგებლოდ იქცევა. ამის შესახებ მან მთავრობის სხდომის დასრულების შემდეგ განაცხადა.

"ჩვენ სანქციების ენით არ ვესაუბრებით ბიზნესს, ჩვენ ვთავაზობთ დამატებით მხარდაჭერასა და დამატებითი სუბსიდირების პაკეტს. და უნდა ვიცოდეთ, რომ ბიზნესი თუ იქცევა უპასუხისმგებლოდ, შესაბამისად დახმარების პასუხისმგებლობა არ აქვს სახელმწიფოს და იმ ჩვენ თანამოქალაქეებს, რომლის გადასახადებიდანაც ვიხდით ამ სუბსიდირებას, სხვათა შორის, ამ ბიზნესის გამართულად მუშაობისთვის", — აღნიშნა ცქიტიშვილმა.

დღეს, 4 თებერვალს პრემიერმინისტრმა, გიორგი გახარიამ განაცხადა, რომ ნებისმიერი ორგანიზაცია, რომელიც დაარღვევს არსებულ შეზღუდვებსა და წესებს მომავალში სახელმწიფოს მხრიდან სუბსიდიასა და დახმარებას ვეღარ მიიღებს.

დაწესებული შეზღუდვების მიუხედავად 6 თებერვლიდან ზოგიერთი რესტორანი გახსნას აპირებს. როგორც გასტრონომიის ასოციაციის ხელმძღვანელმა, ლევან ქოქიაშვილმა განმარტა, სტუმართმასპინძლობის ინდუსტრიის მოლოდინი არ გამართლდა და გონივრული გამოსავლის პოვნის ნაცვლად, ხელისუფლების წარმომადგენლებთან შეხვედრაც გადაიდო. მისივე თქმით, სხვა გამოსავალს ვერ ხედავენ და ამიტომ გახსნას აპირებენ.