საზოგადოებრივი მაუწყებლის ინფორმაციით, საქალაქო სასამართლოს ყოფილი თავმჯდომარე, მამუკა ახვლედიანი სარჩელს ამზადებს.

ახვლედიანი თეა წულუკიანის, მამუკა მდინარაძის, არჩილ თალაკვაძის და ზვიად ძიძიგურის წინააღმდეგ სარჩელს შეიტანს. ამის შესახებ ახვლედიანმა მოამბესთან სატელეფონო კომენტარი გააკეთა:

"ეს არის ძალიან მარტივი გადასამოწმებელი - რა როგორ შევიძინე, რა თანხები მაქვს ოფშორში და საერთოდ რა კავშირი მაქვს ამ ყველაფერთან. სასამართლოს სისტემასაც კატეგორიულად მოვთხოვ, რომ ძალიან სწრაფად განიხილოს."

ქართული ოცნების ლიდერების მიერ გავრცელებულ ინფორმაციას ახვლედიანი პატივისა და ღირსების შემლახავად მიიჩნევს. მაგალითად, არჩილ თალაკვაძემ, გუშინ, 4 თებერვალს ტვ იმედის ეთერში განაცხადა:

"ბატონი ახვლედიანის განკარგვაში, როდესაც ის სასამართლოში მუშაობდა თავს იყრის კოლოსალური რაოდენობის ფინანსური რესურსი. ეს არის 800 ათასი დოლარი ეს არის მილიონ ექვსასი ათასი დოლარი, რომელსაც იგი ფლობდა და განკარგავდა და პირდაპირ გეტყვით, რომ ეს არის მის პოზიციაზე მომუშავე ადამიანის, მოსამართლის 120 წლის ხელფასი."