რესტორატორთა ასოციაციის დამფუძნებელი, შოთა ბურჯანაძე ამბობს, რომ დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელს, ამირან გამყრელიძის ჰგონია "ბრეჟნევის პერიოდში" ვცხოვრობთ. ასე ეხმაურება იგი გამყრელიძის განცხადებას, რომ რესტორნებში ალკოჰოლის მიღების შემდეგ, ადამიანებს შორის ახლო კონტაქტის რისკი იზრდება.

"თურმე რესტორანი იმიტომ არ უნდა გაიხსნას, პირბადე არ იხმარება იქ, წესით და რიგით, არის შესაძლებელი რომ დათვრეს ხალხი რესტორანში და ერთმანეთი კოცნონ. ბრეჟნევის პერიოდს იხსენებს, ბრეჟნევი რომ კოცნიდა ხალხს, ეს ჰგონია, ამ პერიოდში ვცხოვრობთ, გამყრელიძეს. თვითონ, ჰგონია, რომ დარბაზში შევა, იქ იქეიფებს, "ტრულაილას ფული რად უნდა" — ამას მოისმენს და ეს არის დღეს რესტორანი. არ არის ქალბატონებო და ბატონებო რესტორანი ეს", — განაცხადა შოთა ბურჯანაძემ TV პირველის ეთერში.

ბურჯანაძის თქმით, საკოორდინაციო საბჭოს წევრებს არ ჰყოფნით კომპეტენცია ისე მართონ სიტუაცია, რომ რესტორნებმა რეგულაციების პარალელურად შეძლონ მუშაობა.

"დღეს კომპეტენცია არ ჰყოფნის ამ ხალხს, სწორად გათვალონ, ჩვენ დაგვსვან იმ სიტუაციაში, რო რეგულაციით შესაძლებელი არის ოპერირება. ამას ვითხოვთ", — ამბობს ბურჯანაძე.

მისი ინფორმაციით, ამ დროისთვის 200-მდე რესტორანი აპირებს მუშაობის განახლებას.

"რაოდენობას ვეძებთ ჩვენ, მთავარი არის, რომ ერთ ადამიანსაც პროტესტი თუ აქვს, მნიშვნელოვანია, რომ სახელმწიფომ ყურადღება მიაქციოს", — ამბობს ბურჯანაძე.

აკრძალვების მიუხედავად, 6 თებერვლიდან რესტორნები გახსნას გეგმავენ. 30 იანვარს 200-მდე რესტორანმა პროტესტის ნიშნად მიტანის სერვისი გათიშეს. რესტორატორები შეზღუდვის მოხსნას და მუშაობის უფლებას ითხოვენ.

3 თებერვალს, ეკონომიკის მინისტრმა, ნათია თურნავამ განაცხადა, რომ რესტორნების მფლობელების მხრიდან კანონის დარღვევას, მკაცრი რეაქცია მოჰყვება.

გაიგეთ მეტი: