რუსთავში შინაგან საქმეთა სამინისტროს დროებითი მოთავსების იზოლატორი გაიხსნა. შსს-ს პრესსამსახურის ინფორმაციით, იზოლატორის გახსნას შინაგან საქმეთა მინისტრის მოადგილე შალვა ხუციშვილი, დროებითი მოთავსების უზრუნველყოფის დეპარტამენტის დირექტორი უშანგი პაპუაშვილი და დეპარტამენტის სხვა თანამშრომლები ესწრებოდნენ.

"განახლებული იზოლატორი, რომლის სამშენებლო და სარემონტო სამუშაოები რამდენიმე თვის განმავლობაში მიმდინარეობდა, სრულად შეესაბამება თანამედროვე, დასავლურ სტანდარტებს. მისი რეკონტრუქციისას გათვალისწინებული იქნა, დროებითი მოთავსების იზოლატორებთან დაკავშირებით, ევროპის წამების პრევენციის კომიტეტის სტანდარტები და საქართველოს სახალხო დამცველის რეკომენდაციები," - წერია შსს-ს მიერ გავრცელებულ პრესრელიზში.

მათივე ინფორმაციით, განახლებული ორსართულიანი შენობა აღჭურვილია ახალი ტექნიკით, ავეჯითა და ინვენტარით და სამედიცინო პუნქტში მუდმივად არის მედიცინის თანამშრომელი.