რუსი ოპოზიციონერის, ალექსეი ნავალნის ცოლი, იულია ნავალნაია ქმრის, ალექსეი ნავალნის მხარდასაჭერ აქციაზე მონაწილეობისთვის სასამართლომ 20 000 რუბლის ოდენობით დააჯარიმა. Deutsche Welle-ს ცნობით, იულია ნავალნაიას ადვოკატი გადაწყვეტილების გასაჩივრებას აპირებს.

ნავალნის ცოლი გუშინ, 31 იანვარს დააკავეს. ნავალნისა და სხვა პოლიტპატიმრების მხარდასაჭერი საპროტესტო აქციები გუშინ განახლდა. მედიის ინფორმაციით, ძალოვანი უწყებების წარმომადგენლები მომიტინგეებს ფიზიკურად უსწორდებოდნენ. სოციალური ქსელში, ასევე, გავრცელდა ვიდეობი, სადაც ჩანს, რომ სამართალდამცავები დაკავებულების წინააღმდეგ ელექტროშოკს იყენებდნენ.

31 იანვრის აქციაზე რუსეთის მასშტაბით 5 000-ზე მეტი დემონსტრანტი დააკავეს, მათ შორის 1 600-მდე მოსკოვში.

რუსეთში განვითარებულ მოვლენებს გამოეხმაურა ამერიკის შეერთებული შტატების ახლადარჩეული სახელმწიფო მდივანი, ენტონი ბლინკენი. მან მშვიდობიანი მომიტინგეების მიმართ მკაცრი ზომების გამოყენება დაგმო და კრემლს ნავალნისა და სხვა დაკავებულების გათავისუფლებისკენ მოუწოდა.

გერმანიიდან რუსეთში დაბრუნებული ალექსეი ნავალნი აეროპორტში 17 იანვარს დააკავეს. მას პირობითი მსჯავრის დარღვევას ედავებიან. რუს ოპოზიციონერს 30-დღიანი პატიმრობა შეუფარდეს.

ნავალნის დაკავების გამო რუსეთის რამდენიმე ქალაქში საპროტესტო აქციები 23 იანვარსაც გაიმართა. ყველაზე მასშტაბური იყო მოსკოვსა და სანქტ-პეტერბურგში. არასანქცირებულ აქციაზე გასული დემონსტრანტები პოლიციამ ძალის გამოყენებით დაშალა და მათ წინააღმდეგ ხელკეტებს იყენებდა. სამი ათასამდე პირი კი დააკავეს.