თბილისის გარშემო მდებარე სამი სოფლის მოსახლეობა სასმელი წყლის პრობლემის მოგვარებას ითხოვს. ლისის, წოდორეთისა და მუხათწყაროს მცხოვრებლები ლისის მიმდებარე ტერიტორიაზე შეიკრიბნენ.

"ჩვენ დღეს ვახმოვანებთ სამი სოფლის მოთხოვნას. ეს არის წოდორეთი, ლისი და მუხათწყარო, სადაც არ გვაქვს არც სასმელი და არც სარწყავი წყალი", — ამბობს მთავარ არხთან აქციის ერთ-ერთი მონაწილე.

"ორჯერ იყო დაფინანსება გამოყოფილი, მაგრამ არცერთხელ არ შესრულდა. მილები არის, 20 მეტრში არის წყალი, 20 მეტრის ზემოთ უკვე აღარ არის. ზემოთ სოფლებში ხომ საერთოდ აღარ არის. ზოგს ჭა არ აქვს, საიდან სად დადის და ასე შემდეგ. ხალხი წვალობს", — განაცხადა აქციის მონაწილემ.

მათივე თქმით, შესაბამის უწყებებს პრობლემის მოგვარების თაობაზე არაერთხელ მიმართეს, მაგრამ დადებითი პასუხი ვერ მიიღეს.