შესწორება: მასალის თავდაპირველი სათაური არასწორი იყო და შეიცვალა. კერძოდ, სტატიას ერქვა — "ღმერთი იძლევა, დაიძინებ არაფერი გაქვს, გაიღვიძებ და უცებ ვიღაცა მოდის — მეუფე საბა ძვირადღირებულ მანქანებზე" — რაც არასწორია, რადგან ეს სიტყვები მიტროპოლიტმა ხალხის დახმარებაზე და მათთვის სახლების შეძენაზე საუბრისას გამოიყენა. სტატია მომზადდა მთავარი არხის სიუჟეტზე დაყრდნობით, სადაც მიტროპოლიტის ციტატები დაკავშირებული იყო მანქანების შეძენასთან, თუმცა ეპარქიის ფეისბუქგვერდზე გავრცელდა ინტერვიუს სრული ვერსია, სადაც ისმის, რომ მეუფე ამას სხვა თემაზე საუბრის დროს ამბობს. On.ge ბოდიშს უხდის მკითხველს გადაუმოწმებელი ინფორმაციის გაშუქებისა და შეცდომაში შეყვანისთვის.

"24 წლის განმავლობაში მე ეპარქიაში მაქვს აშენებული 70-ზე მეტი ტაძარი, 8 მონასტერი, უამრავი საცხოვრებელი სახლი, საერთო ბინები კი არა. ადამიანებისთვის, მღვდლისთვის, მძღოლისთვის, მონასტრის ხალხისთვის და ჩვენი მრევლისთვის, ადამიანები, ვისაც ამის საჭიროება აქვს, მათთვის საცხოვრებელი სახლები შეძლებისდაგვარად. საიდან მოდის ეს შესაძლებლობა, ალბათ, კითხვა გაქვთ.

ამ შესაძლებლობას გვაძლევს ღმერთი. მე ვერ ვიტყვი საიდან მოდის, მაგრამ მოდის, ღმერთი იძლევა. დაიძინებ, გაიღვიძებ... დაიძინებ არაფერი გაქვს, გაიღვიძებ და უცებ ვიღაცა მოდის ადამიანი, რომელიც რაღაცას გთავაზობს და მერე ეს შემოთავაზება არის გადასახული, აი, ამ საქმიანობაში" — განაცხადა მიტროპოლიტმა და აღნიშნა, რომ არავინ აშუქებს იმას, რომ ეკლესია ასე იქცევა.

ამავე ინტერვიუს დროს ავტომანქანებზე დასმული კითხვის პასუხად, მიტროპოლიტი ამბობს:

"არასწორი ინფორმაციაა, მე არა მყავს 7 მანქანა. მე ეპარქიაში მაქვს 8 მონასტერი. მონასტრებს მანქანები ჰყავს, ეპარქიას, რეზიდენციას თავისი მანქანა. მე ვმონაწილეობ ამ მანქანების შესყიდვაში, მაგრამ ვაძლევ მონასტრებს, სასულიერო პირებს, მღვდლებს, რომლებიც ამით სარგებლობენ".

დამაზუსტებელ კითხვაზე, რა მოდელის მანქანებზე საუბრობს, მიტროპოლიტი პასუხობს:

"რა მნიშვნელობა აქვს ამას? რა მნიშვნელობა აქვს რა მოდელის? მოდელს რა მნიშვნელობა აქვს? რომელ ემბლემაზე ვზივარ, ამას რა მნიშვნელობა აქვს?"

მასალის თავდაპირველ ვერსიაში ეს საკითხი წარმოჩენილი იყო ისე, თითქოს, მიტროპოლიტი კუთვნილი მანქანების მოდელს არ ამხელდა.

რაც შეეხება მანქანების ჩუქებას და ძვირადღირებულ ავტომობილებს, მიტროპოლიტი ამბობს, რომ ის 3 წელი ნათხოვარი მანქანით დადიოდა და არავის "შეუქია" ამისთვის, ვიღაცები კი მარტო ნაჩუქარ მანქანებს ამჩნევენ. მისი თქმით, ზოგი ამბობს, რომ მანქანა გაყიდოს და ხალხს დაეხმაროს, თუმცა ამ მანქანით საქმეს აკეთებს და ხალხსაც ეხმარება, მაგრამ "ამის შესახებ არ საუბრობს".

"თქვენ ჩვენი ცხოვრების წესი არ იცით. ადამიანებს მარტო ის ჰგონიათ, რომ თუ ჩვენ მანქანით დავდივართ და კარგი მანქანით დავდივართ და დაბადების დღეზე თუ გაჩუქა ვიღაცამ და რატომ? იმიტომ, რომ საქმეები გაქვს გაკეთებული".