ბოლო პერიოდში სხვადასხვა ინტერნეტ გვერდი ავრცელებს ინფორმაციას იმის შესახებ, რომ მთავრობის გადაწყვეტილებით, მართვის მოწმობის აღება თეორიული ნაწილის ჩაბარების გარეშეც გახდა შესაძლებელი.

On.ge-ის Facebook გვერდზე ამ კითხვით არაერთი ადამიანი დაუკავშირდა, რის შემდეგაც ინფორმაციის გადამოწმების მიზნით შინაგან საქმეთა სამინისტროს მივმართეთ.

უწყებაში ამბობენ, რომ ამ ტიპის გამონაკლისი დაწესებული არ არის და მართვის მოწმობის ასაღებად კვლავაც საჭიროა როგორც თეორიული, ისე პრაქტიკული გამოცდის ჩაბარება.

ამასთან, კორონავირუსის პანდემიის გამო, დროებით მართვის მოწმობის გამოცდები შეჩერებული იყო. მთავრობის გადაწყვეტილებით, ეს შეზღუდვა პირველი თებერვლიდან იხსნება და სწორედ ამ დროიდან, მსურველები მართვის უფლების მისაღებ თეორიულ და პრაქტიკულ გამოცდებზე გასვლას ისევ შეძლებენ.