დეზინფორმაცია — ამ საკითხზე უამრავს ვსაუბრობთ, ვწერთ და ვმსჯელობთ მოზრდილები.

პატარები სულ ამ საუბრების მიღმა რჩებიან, თუმცა ყველაფერს ისმენენ, იაზრებენ და, ხშირ შემთხვევაში, ზოგიერთ უფროსზე უკეთაც ხვდებიან, როგორ გაარჩიონ ტყუილი და მართალი, როგორ ამოიცნონ დეზინფორმაცია და ყალბი ამბავი.

On.ge-მ შვიდ ბავშვს დაუსვა კითხვები, რომლებსაც ხშირად მათი მშობლებიც ვერ პასუხობენ: რა არის დეზინფორმაცია, როგორ და რატომ ავრცელებენ მას და როგორ იქცევიან თავად, როცა საეჭვო ინფორმაციას წააწყდებიან ხოლმე.

ვიდეოს პირველივე ღიმილისმომგვრელი ფრაზა 9 წლის მაშოს ეკუთვნის: "დეზინფორმაცია ესაა დეზინფექციის ინფორმაცია." გასაკვირიც არაა, მაშოს პირველივე ასოციაცია დეზინფორმაციასთან დეზინფექცია და, შესაბამისად, კორონავირუსი რომ იყო: მოგვიანებით 13 წლის კესოც აღნიშნავს პანდემიის გარშემო გავრცელებულ დეზინფორმაციას და მის მავნებლობას.

11 წლის ვილიამი საინტერესო პარალელს ავლებს: "დეზინფორმაცია ხალხური ლექსივითაა, არ ვიცით, ვინ დაიწყო, არ ვიცით, საიდან დაიწყო, რატომ დაიწყო, რატომ მოიგონა." 8 წლის კატო კი დარწმუნებულია, რომ დეზინფორმაცია ტექნიკით, მაგალითად, ლეპტოპით ვრცელდება. კატო არ ცდება - მიუხედავად იმისა, რომ ადამიანები ყალბ ამბებს მუდამ ქმნიდნენ და ავრცელებდნენ, ინტერნეტის ხელმისაწვდომობასთან ერთად ამ ამბების გავრცელების მასშტაბი და გავლენა ბევრად გაიზარდა.

13 წლის ჯონის აზრით დეზინფორმაციას ხალხის დასაპანიკებლად და ყურადღების მისაქცევად ავრცელებენ. 13 წლის თაკოს ჩემი ცოლის დაქალების პერსონაჟი, ელვირი ახსენდება.

13 წლის ომარი თვლის, რომ დეზინფორმაციას ჰაკერები ავრცელებენ ხოლმე, იმის სასარგებლოდ, ვინც ფულს იხდის. ის ყოველთვის ამოწმებს ინფორმაციას, რომელიც ხვდება სოციალური ქსელების საშუალებით, იმიტომ, რომ ესმის, შეიძლება სწორედ ფეისბუქზე ერთი შეხედვით უწყინარად გაზიარებული სტატია იყოს ყალბი ამბების შემცველი.

8 წლის კატოს იოლად ვერ გააცურებთ: მან ინტერნეტში ქალთევზას ვიდეო თავისი თვალით ნახა, თუმცა იცის, რომ ქალთევზები არ არსებობენ, ამიტომ არც დაუჯერებია. 11 წლის ვილიამი კი "ადვილ ხერხს" გვასწავლის: "მე ასე ვიქცევი, არ ვიჯერებ არანაირ ინფორმაციას ფეისბუქზე."

იხილე ვიდეო სრულად: კესო, მაშო, ვილიამი, თაკო, კატო, ჯონი და ომარი გვიყვებიან, რა იციან დეზინფორმაციაზე.

მასალა მოამზადა On.ge-მ აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის დამზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სტატიის შინაარსზე პასუხისმგებელია On.ge. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.

თუ გინდა, რომ ნამდვილი და ყალბი ამბები ერთმანეთისგან მარტივად განასხვავო და დეზინფორმაციისგან სხვებიც დაიცვა, შემოგვიერთდი ჯგუფში – ერთად ვებრძოლოთ დეზინფორმაციას.