თურქეთში ძაღლი შეუძლოდ გამხდარ პატრონს, რომელიც საავადმყოფოში სასწრაფო დახმარების მანქანით გადაიყვანეს, თან გაჰყვა, შემდეგ კი მას თითქმის მთელი კვირა ელოდა დაწესებულების გარეთ.

ძაღლი, სახელად ბონჯუკი (რაც თურქულად "მძივს" ნიშნავს), თავის პატრონთან, ჯემალ სენთურქთან ერთად, ტრაპიზონში ცხოვრობს. 14 იანვარს, როცა სენთურქი ცუდად გახდა, იგი დაუყოვნებლივ გადაიყვანეს ქალაქის საავადმყოფოში, თუმცა, როგორც თურქული საინფორმაციო სააგენტო DHA იტყობინება, ერთგულმა ძაღლმა პატრონთან განშორება არ ისურვა.

სენთურქის ოჯახმა ძაღლი შინ წაიყვანა, თუმცა ბონჯუკი მაინც ჯიუტად ბრუნდებოდა ყოველდღე საავადმყოფოსთან.

საავადმყოფოს დაცვის თანამშრომლის, მუჰამეთ აქდენიზის თქმით, ძაღლი დილაადრიან მიდიოდა დაწესებულებასთან და გვიანობამდე იცდიდა.

"როცა კარს აღებდენ, ეგრევე შიგნით ყოფდა თავს ხოლმე", — ამბობს აქდენიზი.

ცხადია, ტრაპიზონელმა ჰაჩიკომ არც საავადმყოფოს თანამშრომლები დატოვა გულგრილად განწყობილი, ამიტომ მედპერსონალი მას მუდმივად აპურებდა.

ნანატრი შეხვედრა 20 იანვარს შედგა, როცა ექვსდღიანი ლოდინის შემდეგ ბონჯუკმა და სენთურქმა ერთმანეთი მცირე ხნით კვლავ ნახეს.

ბონჯუკი და სენთურქი.

ფოტო: DHA / AP

DHA-მ ვიდეოც გამოაქვეყნა, სადაც ჩანს, როგორი გახარებულია პატრონთან შეხვედრით ერთგული ძაღლი.

"ჩემზე ძალიან შეჩვეულია და მეც სულ მენატრებოდა", — ამბობს სენთურქი.