ინაუგურაციიდან სულ რამდენიმე საათში ბაიდენმა 17 განკარგულებას მოაწერა ხელი და ტრამპის მიერ დაწყებული არაერთი პროცესი, მათ შორის საზღვარზე კედლის მშენებლობა და ჯანდაცვის მსოფლიო ორგანიზაციიდან ქვეყნის გამოსვლა, შეაჩერა. მიუხედავად იმისა, რომ მის გადაწყვეტილებებს მეტწილად დადებითი გამოხმაურება მოჰყვა, რამდენიმე ადამიანმა იგი გააკრიტიკა.

ცოტა ხნის წინ ტვიტერზე ჰეშტეგი #BidenErasedWomen ("ბაიდენმა ქალებს ხაზი გადაუსვა") გამოჩნდა. ასეთი ფორმით ინტერნეტმომხმარებლების ნაწილი ბაიდენის იმ გადაწყვეტილებას აპროტესტებს, რომელიც ტრანსგენდერ ადამიანებს დისკრიმინაციისგან იცავს.

ამჟამად აშშ-ში ტრანსგენდერ ადამიანებს მხოლოდ ეგრეთ წოდებული მეცხრე უფლება იცავს, რომელიც ფედერალურ დონეზე მიღებული სამოქალაქო კანონია და საგანმანათლებლო დაწესებულებებში, მათ შორის სკოლებსა და უნივერსიტეტებში, გენდერული ნიშნით დისკრიმინაციას კრძალავს.

მიუხედავად ამისა, აღნიშნული კანონის მიმართება შეიცვალა, როცა დონალდ ტრამპმა გენდერი "ბიოლოგიურ სქესად" განსაზღვრა. ბაიდენის გადაწყვეტილება კი იმას ნიშნავს, რომ უნივერსიტეტებსა და სკოლებში ტრანსადამიანებს შესაბამისი საპირფარეშოთი და გამოსაცვლელი ოთახით სარგებლობა შეეძლებათ; ასევე, შესაძლებელი იქნება სპორტულ ღონისძიებებში იასპარეზონ მათთვის შესაფერის კატეგორიაში.

გადაწყვეტილება ბაიდენის წინასაარჩევნო დაპირებათაგან ერთ-ერთია. პრეზიდენტმა პირობა დადო, რომ იგი ტრანსგენდერ ადამიანებს დაიცავდა. მიუხედავად ამისა, გადაწყვეტილება კრიტიკის საბაბი გახდა ჯგუფისთვის, რომელსაც პოპკულტურაში ხშირად TERF-ად მოიხსენებენ.

რა არის TERF?

TERF არის trans-exclusionary radical feminist-ის აბრევიატურა, რომელიც იმ "რადიკალ ფემინისტს" მიემართება, რომელიც "არ ცნობს ტრანსგენდერ ადამიანებს". ამ ტერმინით მოხსენიებული ადამიანები მიიჩნევენ, რომ ტრანსგენდერი ქალები "ნამდვილი ქალები" არ არიან, ბავშვებს კი საკუთარი გენდერის შეცნობა არ შეუძლიათ. ორივე იდეა რამდენჯერმე გაჟღერდა ცნობილი ადამიანების, მათ შორის ჯოან როულინგის, მიერ.

ამასთან, TERF-ები ტრანსგენდერ ქალებს მათთვის საფრთხედ აღიქვამენ და მოითხოვენ, გარკვეულ სერვისებზე წვდომა შეეზღუდოთ.

ჰეშტეგის ქვეშ დაწერილი ტვიტების ავტორები აცხადებენ, რომ, მათი აზრით, დისკრიმინაციის აკრძალვა არაერთ პრობლემას წარმოშობს. მათ შორის, სპორტის სახეობებში მონაწილეობისას, როცა სისგენდერ ქალებს წარმატების ნაკლები შანსი ექნებათ. მათი განცხადებით, "აშშ-ში ქალებმა და გოგოებმა დაკარგეს მხოლოდ მათთვის განკუთვნილი ადგილები, სპორტის სახეობები და ყველაფერი".

კრიტიკის მიუხედავად, ბაიდენის გადაწყვეტილებას უამრავმა ადამიანმა დაუჭირა მხარი. მათ აღნიშნეს, რომ ცვლილება "დაიცავს იმ ამერიკელებს, რომლებიც მათი იდენტობის გამო, შესაძლოა, გაკიცხვის და დამცირების სამიზნედ იქცნენ".

"ბაიდენის გადაწყვეტილება ტრანსგენდერი ადამიანების უფლებების აღიარებაა. ეს მათ დაიცავს სამსახურების დაკარგვისა და სხვა უსიამოვნებებისგან, რომელიც აქამდე ლეგალური იყო. მოდით, ამაზე ვკონცენტრირდეთ და არა შეთხზულ სისულელეზე", — წერს ერთ-ერთი ინტერნეტმომხმარებელი.