იტალიურმა პოლიციამ ნეაპოლში მდებარე ბინაში ლეონარდო და ვინჩის Salvator Mundi-ის, იგივე სამყაროს მხსნელის 500 წლის წინ შექმნილი ასლი იპოვა, რომელიც მუზეუმიდან ისე გაუჩინარდა, რომ ვერავინ გაიგო.

პოლიციის ოფიცრების განცხადებით, მათ ბინის მეპატრონე, 36 წლის კაცი დააკავეს, რომელიც საკუთრების მოპარვაშია ეჭვმიტანილი. ნახატი სწორედ მისი საძინებლის კარადაში აღმოაჩინეს.

ტილო, რომელზეც იესო ქრისტეა გამოსახული, ნეაპოლში, სან დომენიკო მაჯორეს ეკლესიასთან მდებარე დომას მუზეუმის კოლექციას ეკუთვნის. ნამუშევარი ლეონარდო და ვინჩის ცნობილი ნახატის ასლია, რომელიც 2017 წელს, აუქციონზე ყველა დროის ყველაზე ძვირ ტილოდ — $450 მილიონად — გაიყიდა.

მუზეუმმა ნახატის გაუჩინარების შესახებ არ იცოდა, რადგან დაწესებულება უკვე რამდენიმე თვეა, კორონავირუსის პანდემიასთან დაკავშირებული შეზღუდვების გამო დაკეტილია.

"ნახატი გასულ შაბათს ვიპოვეთ პოლიციის შესანიშნავი და გულმოდგინედ ჩატარებული ოპერაციის შედეგად", — ამბობს ნეაპოლის პროკურორი ჯოვანი მელილო, — "აღნიშნულ საკითხთან დაკავშირებით ჩვენ არავინ მოგვმართა. რეალურად, თავად დავუკავშირდით ეკლესიას, რომელმაც ტილოს გაუჩინარების შესახებ არ იცოდა, რადგან მუზეუმი სამი თვეა, არ გაღებულა".

რადგან მუზეუმში შეღწევის მცდელობის არანაირი ნიშანი აღმოჩენილი არაა, პოლიცია ახლა იძიებს, როგორ მოიპარეს ნახატი დაწესებულებიდან.

"ვინც ნამუშევარი აიღო, ცხადია, მას ეს სურდა და მეტად სარწმუნოა ის მოსაზრება, რომ ეს ჯგუფური ქურდობა იყო — იმ ორგანიზაციის მიერ დაგეგმილი, რომელიც ხელოვნების ნიმუშებით საერთაშორისო ვაჭრობას ეწევა", — დასძენს მელილო.

ზეთში შესრულებული ნახატი მიჩნეულია, რომ მხატვარ ჯაკომო ალიბრანდის ეკუთვნის. ნამუშევარი ადრეული 1500-იანი წლებით თარიღდება.

ლეონარდოს შექმნილი ორიგინალური ნახატი კი, რომლის ავთენტიკურობასაც არაერთი ექსპერტი ეჭვქვეშ აყენებს, რეკორდული ფასით გაყიდვის შემდეგ აღარავის უნახავს.

ასევე იხილეთ: