საქარველოს შინაგან საქმეთა სამინისტროს ინფორმაციით, დააჯარიმეს ტაქსის მძღოლები, რომლებიც კორონავირუსით ინფიცირების მიუხედავად, ქუჩაში მანქანით გადაადგილდებოდნენ. უწყება არაფერს ამბობს იმაზე, ჰყავდათ თუ არა მათ მგზავრები.

უწყების ცნობით, ერთი მძღოლი კოვიდაღრიცხვაზე 5 იანვრიდან იმყოფება, ხოლო მეორე — 13 იანვრიდან და ორივე მათგანზე სპეციალისტებმა თვითიზოლაციის რეკომენდაცია გასცეს.

"მიუხედავად ამისა, აღნიშნულმა კოვიდინფიცირებულმა პირებმა თვითნებურად დატოვეს იზოლაციის ადგილი. სამართალდამცველებმა კორონავირუსით დაინფიცირებული გ.ფ. იმ დროს დააჯარიმეს, როდესაც იგი თბილისში, წერონისის ქუჩაზე, ავტომობილით გადაადგილდებოდა. რაც შეეხება კოვიდაღრიცხვაზე მყოფ ზ.ს.-ს, იგი სავაჭრო ცენტრ "ქარვასლას" მიმდებარე ტერიტორიაზე, ტაქსის ტრაფარეტიანი ავტომობილით გადაადგილებისას დაჯარიმდა", — აცხადებენ უწყებაში.

მათივე თქმით, თითოეულ მძღოლს 2 000-ლარიანი ჯარიმა გამოუწერეს და კოვიდსასტუმროში გადაიყვანეს.

"შინაგან საქმეთა სამინისტრო კვლავ მოუწოდებს მოქალაქეებს, გამოიჩინონ მაღალი საზოგადოებრივი პასუხისმგებლობა, დაიცვან კანონი და დაემორჩილონ დაწესებულ რეგულაციებს", — აღნიშნავენ უწყებაში.