საქართველოს მუფთი, ადამ შანთაძე ჩოხატაურის სოფელში ჩავიდა და შეკრებილ მუსლიმ მოქალაქეებს განუცხადა, რომ ხვალიდან, პარასკევის ლოცვა შედგება და ეს პროცესი გაგრძელდება. მან აღნიშნა, რომ, რაც მოხდა, სამწუხაროა, მაგრამ პროვაკციებზე აყოლა არ უნდა მოხდეს.

"ჩვენი ქვეყანა ყოველთვის იყო მრავალფეროვანი, მრავალკონფესიური, მრავალეთნიკური და საუკუნეების განმავლობაში აქ ძმურად, მეგობრულად ცხოვრობდნენ სხვადასხვა ეთნოსისა თუ სხვადასხვა აღმსარებლობის ადამიანები. მათ თავიანთი წვლილი შეჰქონდათ ერთიანი ძლიერ ქვეყნის აღმშენებლობის საქმეში. ეს ასეა დღესაც. ეთნიკური, რელიგიური მრავალფეროვნება არის ჩვენი ისტორიული და კულტურული სიმდიდრე, რომელსაც გაფრთხილება და დაცვა სჭირდება.

რა თქმა უნდა, ძალიან სამწუხაროა ის, რაც სოფელ ბუკნარში 2 დღის წინ მოხდა. ჩვენ ძალიან დაგვამწუხრა ამ მოვლენამ. მე გახლდით იმ საღამოს ჩამოსული, შევხვდი მლოცველებს, ვისაუბრეთ, რომ მთავარი ჩვენი მიზანი არის, რომ ლოცვები გაგრძელდეს და სოფელი დაუბრუნდეს ისევ ძველ, მშვიდობიან მდგომარეობას. ჩვენ ერთი ქვეყნის, ერთი ერის ხალხი, ერთი სისხლი-ხორცი ვართ, ამიტომ ეს ქვეყანა ყველასია. ლოცვები გაგრძელდება, რაც მოხდა, სამწუხაროა, მაგრამ ჩვენ არ უნდა ავყვეთ პროვოკაციებს", — განაცხადა მუფთმა.

ადამ შანთაძის განცხადებას იმის შესახებ, რომ კონფლიქტი ამოწურულია შეკრებილები უკმაყოფილებით შეხვდნენ. ისინი მუსლიმთა კავშირის მუფთს უნდობლობას უცხადებენ. აქციის მონაწილეებს არ სჯერათ, რომ საკითხი ასე მარტივად მოგვარდება.

სამლოცველოს მოწყობის მოთხოვნით მუსლიმი თემის აქცია დღესაც გაიმართა. ქრისტიანი მოსახლეობა მუსლიმების მიერ საკუთარი სახსრებით შეძენილ კერძო სახლში ლოცვას არგუმენტით აპროტესტებს, რომ ეს ქრისტიანული მიწაა დამეჩეთის ადგილი არ არის.

მუსლიმებსა და მართლმადიდებლებს შორის რელიგიურ ნიადაგზე კონფლიქტი გუშინ, 12 იანვარს დაიწყო. ადამიანის უფლებების სწავლებისა და მონიტორინგის ცენტრის (EMC) ინფორმაციით, ბუკნარში მეზობლებს შორის მომხდარი ურთიერთშელაპარაკების დროს მძიმე ფიზიკური დაზიანებები მიაყენეს სამ მუსლიმს, მათ შორის ბავშვებს. დაშავებულები კი მიღებული არაერთი დაზიანებით საავადმყოფოში გადაიყვანეს.

ბუკნარში მომხდარ დაპირისპირებას გამოეხმაურა სახალხო დამცველი. ნინო ლომჯარიამ სოფელში განვითარებულ მოვლენებს სამწუხარო ფაქტი უწოდა და აღნიშნა, რომ მსგავსი შემთხვევა პირველი არ არის, სახელმწიფოს კი თითოეული მოქალაქის ლოცვის უფლების დაცვისკენ მოუწოდა.

EMC-ში აცხადებენ, რომ მომხდარ ინციდენტში 2 ძირითადი სამართლებრივი საკითხი იკვეთება — ძალადობის შემთხვევა დაზარალებული მუსლიმი პირების მიმართ, რომელიც დროულ და ეფექტიან სამართლებრივ რეაგირებას ითხოვს და სალოცავი სივრცის ფუნქციონირებისთვის უსაფრთხო და მშვიდობიანი პირობების შექმნა.

ევანგელისტურ-ბაპტისტური ეკლესია ხელისუფლებას მოუწოდებს, არა მხოლოდ ბუკნარის, არამედ დღემდე მომხდარ ყველა ინციდენტზე გამოძიება დაუყოვნებლივ დაიწყოს. მათი განცხადებით, ქვეყანას, სადაც ახალგაზრებს ლოცვისათვის თავს უტეხავენ, მომავალი არ აქვს.

შინაგან საქმეთა სამინისტროს ცნობით, დააკავეს პირი, რომელმაც 12 იანვარს ბუკნარში ორ თანასოფლელს ქვის გამოყენებით თავის არეში დაზიანებები მიაყენა. მათივე ცნობით, გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს და 6 თვიდან 1 წლამდე ვადით თავისუფლების აღკვეთას ითვალისწინებს.

გაიგეთ მეტი: