თბილისის იუსტიციის სახლმა Just Taxi-ის პროექტი აამოქმედა, რომლის ფარგლებში აუქციონის წესით, შპს სენა მოტორსმა გაიმარჯვა და იუსტიციის სამინისტროს პარტნიორი გახდა.

იუსტიციის სამინისტროს პრესსამსახურის წარმომადგენელმა, მარიამ სხილაძემ On.ge-სთან საუბარში განაცხადა, რომ სამინისტრომ შეადგინა პროექტი და გამოაცხადა აუქციონი. სამინისტროს მთავარი პირობა იყო, რომ კომპანიას მომხარებლებისთვის შეეთავაზებინა სტანდარტებთან შესაბამისი მომსახურება, სანაცვლოდ კი გამარჯვებულს თბილისის იუსტიციის სახლის მიმდებარე ტერიტორიაზე ადგილს გამოუყოფდნენ:

"აუქციონის წესით, კონკრეტულმა კომპანიამ მოიგო, შემოიყვანა ტაქსები. მანქანებიც მათია და მძღოლებიც. ამ კომპანიამ განაცხადა, რომ მას უღირს მგზავრის გადაყვანა კილომეტრზე 50 თეთრად."

მისივე თქმით, აღნიშნული მომსახურება იუსტიციის სახლის სერვისებს უნდა მიბმოდა, ამიტომ დაერქვა Just Taxi.

იუსტიციის სახლის მომხმარებელს Just Taxi-ის მომსახურების მიღება შეეძლება ყოველ სამუშაო დღეს, 09:00-დან 18:00 საათამდე, ხოლო შაბათ-კვირას − 10:00-დან 17:00 საათამდე.