ამერიკის შეერთებული შტატების პრეზიდენტის, დონალდ ტრამპის არხი YouTube-მა, სულ მცირე, ერთი კვირით და პოტენციურად უფრო დიდი ხნით დაბლოკა.

როგორც CNN ირწმუნება, მათ YouTube-მა განუცხადა, რომ პლატფორმაზე ტრამპის ბოლო ვიდეო ძალადობისკენ მოწოდების ელემენტებს შეიცავდა, რომელიც უკვე აღებულია.

YouTube-მ ასევე წაშალა თეთრი სახლის არხის კონტენტი, რომელიც ძალადობის შინაარსს შეიცავდა. YouTube აქამდე ერთადერთი დიდი სოციალური ქსელი იყო, სადაც ტრამპის ანგარიშები დაბლოკილი არ ყოფილა.

ძალადობის შემდგომი წაქეზების რისკის გამო, ამერიკის მოქმედ პრეზიდენტ დონალდ ტრამპს ანგარიში ტვიტერმა სამუდამოდ დაუბლოკა. კომპანიაში განაცხადეს, რომ გადაწყვეტილება მისი ბოლოდროინდელი ტვიტების განხილვის შემდეგ მიიღეს.

BBC-ის ცნობით, კანონმდებელთა და ცნობილ ადამიანთა ნაწილი წლებია, სოციალურ ქსელში ტრამპის ანგარიშის სამუდამოდ აკრძალვას ითხოვდა.

სამომხმარებლო წესების დარღვევისა და ძალადობის წამახალისებელი ტვიტების გამო, აშშ-ის მოქმედი პრეზიდენტის, დონალდ ტრამპის ტვიტერის ანგარიში 12 საათით, 7 იანვარსაც, დაიბლოკა. კომპანიაში განაცხადეს, თუ ტრამპი აღნიშნულ პოსტებს არ წაშლიდა, ანგარიშს განმეორებით დაბლოკავდნენ.

ეს პირველი ე.წ. სანქცია არ არის, რომელიც Twitter-მა დღეს ტრამპის წინააღმდეგ გამოიყენა. ამას წინ უძღოდა პოსტების მონიშვნა ძალადობის რისკის შემცველად, ინტერაქციის შეზღუდვა და მათი წაშლა. იგივე პოსტები გაქრა ტრამპის Facebook-ის ანგარიშიდანაც.

წაშლილი პოსტებიდან ერთ-ერთი ტრამპი მხარდამჭერებს, მათ შორის კაპიტოლიუმში შეჭრილებს "განსაკუთრებულს" უწოდებდა და ამბობდა, რომ ისინი უყვარს. მეორეში კი მათ საქციელს ამართლებდა და აცხადებდა, რომ ასე იქცევიან ადამიანები, რომლებსაც არჩევნები წაართვეს. ტრამპის ეს განცხადებები ძალადობის წახალისებად შეფასდა.

მოგვიანებით ცნობილი გახდა, რომ დონალდ ტრამპის ანგარიშები დაიბლოკა ფეისბუქსა და ინსტაგრამზეც.