ქართული ოცნების თავმჯდომარეობიდან გადამდგარი და პოლიტიკიდან მეორედ მიმავალი ბიძინა ივანიშვილი ამბობს, რომ პარტიაში ოპონირების გამოცდილება აკლიათ. მისი თქმით, ერთმანეთის რიდის და პატივისცემის გამო თანაგუნდელები საპირისპირო აზრებს არ გამოთქვამენ.

"კამათში მოდის ჭეშმარიტება", — ურჩევს ის თანაგუნდელებს და ამატებს, რომ ყველა პრობლემა გუნდში უნდა განიხილონ.

"არ მოერიდონ ერთმანეთის ოპონირებას. შიდა გუნდში მაქსიმალურად უნდა მოხარშონ ყველა პრობლემა, ყველა კრიტიკული და კრიზისული სიტუაცია. მაქსიმალურად ყველა აზრი უნდა მოისმინონ შიგნით, აზრის მოსმენის საშუალება უნდა მისცენ. აი, ეს გამოცდილება აკლიათ ცოტა. ერთმანეთს ერიდებიან, ხათრი აქვთ, პატივისცემა აქვთ და ჰგონიათ, რომ იმან რომ თქვა, იმის საპირისპირო არ უნდა თქვა.

მე რაც შემეძლო, ეს ავუხსენი, რომ თუ ამას გააკეთებენ, ძალიან ნიჭიერი ხალხია გუნდში დარჩენილი. გამოცდილებაც საკმაოდ დიდი აქვთ, ლიდერებს მე შეგნებულად არ ვასახელებ", — განაცხადა მან პირველი არხის ეთერში.

როგორც ის ამბობს, წასვლამდე თანაგუნდელებს ხშირად ხვდებოდა და ეუბნებოდა, რომ თუ რჩევა სჭირდებოდათ, მოესწროთ, რადგან პოლიტიკიდან წასვლის შემდეგ კონსულტაციები შეწყდებოდა.

"მე აღარ ვაპირებ კონსულტაციების მიცემას გუნდისთვის და გუნდის წევრებმა ეს ძალიან კარგად იციან. დიდმა ნაწილმა, ლიდერების ნაწილმა. როგორ გითხრათ, რამდენიმე კომიტეტი გვქონდა, საგარეო თემებზე ვხვდებოდით პარტიებში, ეკონომიკური საბჭო, კომიტეტები კი არა საბჭო. საბჭოს წევრებთან თვეების განმავლობაში მქონდა საუბარი წასვლის შესახებ", — განაცხადა მან.

ქართული ოცნების თავმჯდომარემ, ბიძინა ივანიშვილმა 11 იანვარს განაცხადა, რომ ის პოლიტიკიდან მიდის. პარტიის ახალი თავმჯდომარეობის კანდიდატად ირაკლი კობახიძე დასახელდა.

გაიგეთ მეტი ივანიშვილის ინტერვიუზე: