ქართული ოცნების აღმასრულებელი მდივნის, ირაკლი კობახიძის განცხადებით, 2021 წლის თვითმმართველობის არჩევნებისთვის ხმის მიცემის აპარატებისა და ამომრჩევლის თითის ანაბეჭდით რეგისტრაციის დანერგვა იგეგმება. ამის შესახებ მან პარტიის ოფისში ბრიფინგზე განაცხადა.

როგორც კობახიძემ განმარტა, ეს გამორიცხავს ყოველგვარ მანიპულაციასა და ადამიანურ შეცდომას, ამასთან, ამით საბოლოოდ აღმოიფხვრება დაუბალანსებელი ოქმების პრობლემა.

"ჩვენ ვერ დაველოდებით, როდის დაასრულებს ოპოზიცია ჭირვეულობას და საპარლამენტო უმრავლესობის სახელით ვთხოვ ცესკოს, ოქტომბრის მუნიციპალური არჩევნებისთვის დაუყოვნებლივ დაიწყოს მუშაობა შესაბამისი ტექნიკური აღჭურვილობის უზრუნველყოფაზე", — აღნიშნა მან.

ირაკლი კობახიძის განცხადებით, 2020 წლის საპარლამენტო არჩევნებთან დაკავშირებით დროებითი საგამოძიებო კომისია თებერვლის პირველ კვირაში შეიქმნება. როგორც მან აღნიშნა, საპარლამენტო საქმიანობაში ჩაერთო პარტია ევროპელი სოციალისტები, რამაც "საბოლოოდ ჩამოშალა რადიკალური ოპოზიციის მიერ დაგეგმილი ერთპარტიული პარლამენტის სცენარი".