დონალდ ტრამპის პრეზიდენტობის მე-11 დღე ახალი პოლიტიკური სკანდალით დაიწყო - მან თანამდებობიდან გაათავისუფლა იუსტიციის მინისტრი, რომელიც ასევე აღჭურვილია მთავარი პროკურორის მოვალეობებით.

როგორც Wall Steet Journal წერს, გათავისუფლების შესახებ ბრძანება, სალი იატისს თეთრი სახლის კურიერმა ჩააბარა, მისთვის არ დაურეკავს თავად პრეზიდენტს, როგორც ეს ხდება ხოლმე. ტრამპის აღნიშნული გადაწყვეტილების მიზეზი გახდა იატისის მოქმედება: მან უარი თქვა დაეცვა სასამართლოებში ტრამპის მიერ გამოცემული ბრძანება, რომელიც აშშ-ში გარკვეული ტიპის ვიზიტორებს შესვლას უკრძალავს. იატისმა, გათავისუფლებამდე, ტრამპის ბრძანების შეუსრულებლობისკენ მოუწოდა პროკურორებს ქვეყნის მასშტაბით.

ტრამპმა რამდენიმე დღის წინ გამოსცა ბრძანება, რომელიც შვიდი მუსლიმური სახელმწიფოს მოქალაქეებს ქვეყანაში შესვლას უკრძალავს მიუხედავად იმისა, ისინი ფლობენ თუ არა მოქმედ ვიზასა და აშშ-ში ცხოვრების უფლებას - მწვანე ბარათს. ბრძანების გამოცემისთანავე აეროპორტებში ათეულობით ადამიანი დააკავეს და მათმა ადვოკატებმა იჩივლეს სხვადასხვა სასამართლოში. სწორედ ამ პროცესებზე უნდა დაეცვათ პროკურორებს სახელმწიფოს პოზიცია ტრამპის მიერ გამოცემული ბრძანების საფუძველზე.

სალი იატისს თანამდებობის დატოვება უახლოეს მომავალში მაინც მოუწევდა, რადგან ის ობამას მიერ იყო დანიშნული და თანამდებობას იმ დრომდე შეინარჩუნებდა, სანამ სენატი არ დაამტკიცებდა ტრამპის ახალ კაბინეტს.

სალი იატისმა განმარტა, თუ რატომ არ დაიცვა პრეზიდენტის მიერ გამოცემული ბრძანება სასამართლოებში. მისი თქმით, ის არ არის დარწმუნებული, რამდენად კანონიერია აღნიშნული ბრძანება და იუსტიციის დეპარტამენტი "მიისწრაფვის სამართლიანობისკენ და დგას იმ მხარეს, საითაც სიმართლეა".

იუსტიციის დეპარტამენტის ამგვარ ქმედებას თეთრი სახლის მკაცრი განცხადებები მოჰყვა, რის შემდეგადაც იატისი თანამდებობიდან გაათავისუფლეს. ტრამპის განცხადებით, იატისმა უღალატა იუსტიციის დეპარტამენტს პრეზიდენტის იმ ბრძანების არშესრულებით, რომლის მიზანი ამერიკისა და მისი მოქალაქეების დაცვაა.

დონალდ ტრამპმა იუსტიციის მინისტრის მოვალეობის შესრულება ვირჯინიის აღმოსავლეთ ოლქის პროკურორს, დანა ბოენტეს დაავალა, რომელიც მთლიანად იზიარებს ტრამპის პოლიტიკას მიგრანტების ნაკადის შეზღუდვაზე.