დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ კორონავირუსის შემთხვევების შემცირება დამშვიდების საფუძველს არ გვაძლევს. როგორც მან პირველ არხთან განაცხადა, ახალი შემთხვევების დღევანდელი რაოდენობაც ჩვენთვის საკმაოდ მაღალი რიცხვია.

"მიუხედავად იმისა, რომ სტაბილიზაციისკენ არის სიტუაცია, დამშვიდების საფუძველს არ გვაძლევს", — აღნიშნა გამყრელიძემ.

მისივე თქმით, შეზღუდვების მოხსნასთან დაკავშირებით მომავალი კვირის საკოორდინაციო საბჭოს სხდომებზე ყველა საკითხს დეტალურად განიხილავენ:

"გაანალიზდება ქვეყანაში ეპიდსიტუაცია, ასევე, ის პროგრესი, რასაც მივაღწიეთ შემზღუდველი ღონისძიებებით ნოემბრის ბოლოდან მოყოლებული დეკემბრის 24-მდე. შემდეგ გავაანალიზებთ იმას, თუ რა შედეგები მოგვცა 24-ის შემდეგ შემსუბუქების პოლიტიკამ. ამის მიხედვით მიიღება შემდეგი ნაბიჯების გადაწყვეტილება".

კორონავირუსის შემთხვევების ზრდის გამო ნოემბრის ბოლოდან ქვეყანაში შეზღუდულია საქალაქთაშორისო ტრანსპორტი, ასევე, დიდ ქალაქებში არ მუშაობას მუნიციპალური ტრანსპორტი. შეზღუდულია ზოგიერთი ბიზნესსაქმიანობა: მათ შორის დახურულია სავაჭრო ცენტრები, ბარ-რესტორნები და მაღაზიები. მუშაობას სასურსათო, ზოომაღაზიები და პირველადი დანიშნულების მაღაზიები აგრძელებენ.

10 იანვრის მონაცემებით, საქართველოში კორონავირუსის 1 143 ახალი შემთხვევა დადასტურდა, გამოჯანმრთელდა — 617, ხოლო გარდაიცვალა — 23 პირი. დადასტურებული შემთხვევების საერთო რაოდენობა შეადგენს 239 229-ს. ჯამში გამოჯანმრთელებულთა რაოდენობა გაიზარდა 225 335-მდე, ხოლო გარდაიცვალა სულ 2 773 პირი.