სპეციალური პენიტენციური სამსახურის განცხადებით, N14 (გეგუთის) პენიტენციურ დაწესებულებაში PCR ტესტირების შედეგად კოვიდის არც ერთი შემთხვევა არ გამოვლენილა. როგორც უწყებაში განმარტავენ, 9 იანვარს ტესტირება 763 მსჯავრდებულს ჩაუტარდა.

არაერთი მედიასაშუალებით ვრცელდება ინფორმაცია, რომ პენიტენციურ დაწესებულებებში კორონავირუსთან დაკავშირებული ვითარება რთულია და მსჯავრდებულებს სათანადო ყურადღება არ ექცევათ.

სპეციალური პენიტენციური სამსახურის ბოლო ინფორმაციით, 3 იანვარს N5 (ქალთა) დაწესებულებაში PCR ტესტით კოვიდი 23 ქალს გამოუვლინდა. მათგან 4 პატიმარი, რომელთაც სიმპტომები გამოუვლინდათ, სამოქალაქო კლინიკაში გადაიყვანეს. გარდა ამისა, 9 იანვარს სწრაფი ანტიგენის ტესტით კორონავირუსი 3 პატიმარს გამოუვლინდა, რომლებიც დადასტურებული შემთხვევების კონტაქტები არიან და იზოლაციაში იმყოფებიან.

6 იანვარს ცნობილი გახდა, რომ ქსნის პენიტენციური დაწესებულების ერთი მსჯავრდებული კოვიდით გარდაიცვალა. როგორც იუსტიციის მინისტრმა, გოჩა ლორთქიფანიძემ განაცხადა, ეს ადამიანი სამოქალაქო კლინიკაში იყო გადაყვანილი, სადაც ერთი კვირის თავზე მისი მდგომარეობა დაუმძიმდა.