დღეს, 8 იანვარს, იუსტიციის სამინისტროსთან სამოქალაქო აქტივისტები შეიკრიბნენ. მათი თქმით, ისინი აპროტესტებდნენ პენიტენციურ დაწესებულებებში არსებულ ეპიდემიოლოგიურ ვითარებას.

აქციის მონაწილეები აღნიშნავდნენ, რომ მსჯავრდებულებს არ აქვთ პირბადეებსა და თერმომეტრებზე ხელმისაწვდომობა. მათ სიმბოლურად სცადეს პირბადეების იუსტიციის სამინისტროს შესასვლელთან დატოვება, რისი საშუალებაც სამართალდამცავებმა არ მისცეს.

"პატიმრები ითხოვენ, რომ პირბადე არა გვაქვს ამ პანდემიის დროს და არ დაგვატოვებინეს, კარებთან არ მიგვიშვეს, იცავს პოლიცია ამ უზურპატორის სამინისტროს, სირცხვილია უბრალოდ, პოლიცია გადაიქცა მილიციად", — ამბობს აქციის მონაწილე ფორმულასთან.

დღეს, PCR ტესტების საფუძველზე სამოქალაქო კლინიკაში მყოფ მე-15, მე-17 და მე-8 პენიტენციური დაწესებულების ოთხ პატიმარს კორონავირუსი დაუდასტურდა.

6 იანვარს იუსტიციის მინისტრმა, გოჩა ლორთქიფანიძემ განცხადა, რომ ქსნის სასჯელაღსრულების დაწესებულების ერთი მსჯავრდებული კორონავირუსით გარდაიცვალა.

გაიგეთ მეტი: