სპეციალური პენიტენციური სამსახურის ცნობით, N5 პენიტენციურ (ქალთა) დაწესებულებაში 23 პატიმარს Covid-19 დაუდასტურდა. პენიტენციურ სამსახურში აცხადებენ, რომ ტესტზე დადებითი პასუხის მიუხედავად, მათ კორონავირუსისთვის დამახასიათებელი არანაირი სიმპტომი არ აქვთ და თავს კარგად გრძნობენ.

"ისინი დანარჩენი კონტიგენტისგან იზოლირებულად, დაწესებულების საკარანტინო სივრცეში არიან მოთავსებულები და მედპერსონალის დაკვირვების ქვეშ იმყოფებიან. ასევე, სხვა პატიმრებისგან (მათ შორის კოვიდინფიცირებულებისგან) იზოლირებულად არიან მოთავსებულები ინფიცირებულ პირებთან კონტაქტში მყოფი პატიმრები, რომელთა ტესტების პასუხები იყო უარყოფითი. ვირუსისთვის დამახასიათებელი სიმპტომები მათაც არ აღენიშნებათ, თუმცა ისინიც მედპერსონალის დაკვირვების ქვეშ იმყოფებიან", — აცხადებენ უწყებაში.

რაც შეეხება დაწესებულების თანამშრომლებს, პენიტენციური სამსახურის ინფორმაციით, ისინი სამუშაო ადგილზე ინდივიდუალური დამცავი საშუალებებით (პირბადე, ხელთათმანები, ბახილები და ა.შ.) არიან აღჭურვილები. მათივე თქმით, ასევე, კვირაში ერთხელ PCR ტესტირებას გადიან, ხოლო შუალედში, 72 საათში ერთხელ სწრაფი ტესტით მოწმდებიან.