დაავადებათა კონტროლის ეროვნული ცენტრის ხელმძღვანელის მოადგილე, პაატა იმნაძე კორონავირუსის პირველი ტალღის დროს, რჩევების გათვალისწინებისთვის ქართულ ეკლესიას მადლობას უხდის. ჟურნალისტის კითხვაზე დამდეგი შობის დღესასწაულის ჩატარება ეპიდვითარების კუთხით არის თუ არა რისკისშემცველი, იმნაძე პასუხობს, რომ აღდგომა ან სხვა მოვლენა არაფერ შუაში არის და თუ ადამიანები წესებს დაიცავენ, ინფიცირების რისკი ნაკლებია.

"აღდგომა არაფერ შუაში არის, აპრილი იყო ის თვეა, როცა საქართველოში მატებისკენ [Covid-19-ის] მიდიოდა პროცესები და კიდევ ერთი თავშეყრა იქნებოდა დამატებითი რისკი. ამიტომ, ძალიან დიდი მადლობა ქართულ ეკლესიას, რომლებმაც გაითვალისწინა ჩვენი რჩევები და ყველა წესის დაცვით მაქსიმალურად ჩაატარა [ღვთისმსახურება]. ამიტომ დღესაც ასეა, თუ ადამიანები იცავენ, მაშინ რისკი ინფიცირების ნაკლებია. არ აქვს მნიშვნელობა ეს იქნება ეკლესიაში, სუპერმარკეტში თუ მიტინგზე", — განაცხადა იმნაძემ.

გასული აპრილის თვეში, როცა საქართველოში კორონავირუსის პანდემიის გამო საგანგებო მდგომარეობა და მკაცრი კარანტინი მოქმედებდა, საპატრიარქოს დაჟინებით ეკლესიების ნაწილში სააღდგომო ღვთისმსახურება მაინც ჩატარდა.

"თუ არ დავრჩებით სახლში, ვერ გადავრჩებით", — ამ შინაარსის ფრაზა არაერთხელ გაიმეორა აღელვებული პაატა იმნაძემ 15 აპრილს. მან საზოგადოება იტალიის სცენარისთვის შეამზადა და თქვა, რომ შესაძლოა კუბოები ვერ ავითვალოთ და ერისა და ეკლესიის გადასარჩენად სახლში დარჩენა კრიტიკულად საჭიროა. NCDC-ის დირექტორმა, ამირან გამყრელიძემ კი დღეს მრევლს მოუწოდა, არ წავიდნენ ტაძრებში და ეკლესიასაც სთხოვა, მორწმუნეებს იგივე ურჩიონ.

გაიგეთ მეტი: