ჯანდაცვის მინისტრის მოადგილის განცხადებით, მეცნიერულად არ არის დასაბუთებული, რომ კორონავირუსის ახალი, ე.წ. ბრიტანული შტამი ახალგაზრდებს უფრო მეტად აზარალებს. ამის შესახებ თამარ გაბუნიამ უწყებათაშორისი კომისიის სხდომაზე ისაუბრა.

"რაც შეეხება იმას, თუ რომელ ჯგუფს უფრო მეტად აზარალებს ეს შტამი, რაიმე განსხვავება, მეცნიერულად დასაბუთებული, არ გვაქვს, რომ ვივარაუდოთ, რომ ეს შტამი უფრო მეტად აზარალებს ახალგაზრდა ასაკის მოსახლეობას. გარკვეული ვარაუდი ამასთან დაკავშირებით გამოითქვა, თუმცა დადასტურებული ეს მონაცემი არ არის. ერთადერთი, რაც არის ცნობილი, არის ის, რომ მისი გავრცელების სისწრაფე შესაძლოა იყოს უფრო მეტი, ვიდრე პირვანდელი ვერსიის შემთხვევაში", — თქვა გაბუნიამ.

მისივე ინფორმაციით, ახალი შტამი კლინიკურად იგივენაირად მიმდინარეობს, ვიდრე კორონავირუსის მანამდე ცნობილი ვერსია, თუმცა ცნობილია ის, რომ უფრო სწრაფად ვრცელდება.

თამარ გაბუნიას თქმით, შესწავლილია იმ ადამიანის ყველა კონტაქტი, ვისაც კორონავირუსის ახალი შტამი დაუდასტურდა.

საქართველოში კორონავირუსის ახალი, ე.წ. ბრიტანული შტამი 3 იანვარს დადასტურდა. მანამდე, 28 დეკემბერს, დაავადებათა კონტროლის ეროვნული ცენტრის ხელმძღვანელი, ამირან გამყრელიძე აცხადებდა, რომ მეცნიერების თქმით, ვირუსის ახალი შტამი ახალგაზრდებში უფრო მარტივად გადადის.