ქართული ოცნების დეპუტატის, პაატა კვიჟინაძის განცხადებით თბილისს "ძლიერი მერი" ჰყავს და თუ რამე პრობლემას ხედავს "იქვე შემოაქვს", თუმცა მისი თქმით, პარლამენტში წამოყენებული ახალი ინიციატივები მხოლოდ თბილისს არ უნდა ეხებოდეს და ყველა ქალაქზე უნდა გავრცელდეს. ამის შეხახებ მან პარლამენტის რიგგარეშე სესიის პლენარული სხდომაზე ისაუბრა.

"თბილისს ჰყავს ძლიერი მერი, ძლიერი სამსახურები, ამიტომ თუ რამე პრობლემას ხედავს, იქვე შემოაქვს, რაც ძალიან კარგი და სასიამოვნოა, მაგრამ მარტო თბილისს არ უნდა შეეხოს. არსებობს დიდი ქალაქები, ბათუმი, ქუთაისი, რუსთავი, რომელთაც, დარწმუნებული ვარ, იგივე პრობლემები აქვთ", — განაცხადა მან.

კვიჟინაძე ასე პარლამენტის წევრის, ბექა დავითულიანის ინიციატივას გამოეხმაურა, რომლის თანახმადაც, ადგილობრივი თვითმმართველობის კოდექსში ცვლილებები უნდა შევიდეს. კერძოდ, ახალი ინიციატივის მიხედვით, 1-ელ ივლისამდე უნდა გადაიწიოს ერთგვარი შეღავათების დაწესება თბილისის ქონების იჯარით ან საინვესტიციო პირობებით მოსარგებლეთათვის.

"ვითხოვთ, 163-ე პრიმა 3 მუხლით გათვალისწინებული შინაარსის ვადის გაგრძელებას: ანუ ეპიდემიის ან/და პანდემიის მდგომარეობიდან გამომდინარე მთავრობა უფლებამოსილია ეპიდემიის ან მისი გაუქმების შემდეგ არაუგვიანეს 2021 წლის 1-ელი ივლისისა მიმართოს თბილისის საკრებულოს აუქციონის ფორმით პრივატიზებული თბილისის ქონების შემძენისთვის სარგებლობის უფლებით გადაცემული ან მართვის უფლებით გადაცემული თბილისის ქონების მიმღებისთვის ამ ქონებასთან დაკავშირებული საინვესტიციო პირობების შეცვლის ან გაუქმების, ან/და ფინანსური პირობების შეცვლის შესახებ", — განაცხადა დავითულიანმა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.