კომუნიკაციების კომისიამ მთავარი არხის წინააღმდეგ ქართული ოცნების აღმასრულებელი მდივნის, ირაკლი კობახიძის საჩივარი განიხილა და მთავარ არხს გაფრთხილება მისცა.

აღნიშნული საჩივარი კომისიამ დღეს განიხილა. მათი პოზიზიით, გამომდინარე იქედან, რომ ეს პირველი დარღვევა იყო, სანქცია მხოლოდ გაფრთხილებით შემოიფარგლა.

13 ნოემბერს მთავარი არხის გენერალურმა დირექტორმა, ნიკა გვარამიამ საკუთარ ფეისბუქზე დაწერა, რომ არხი ცენტრალური საარჩევნო კომისიის და ქართული ოცნების არც ერთ საარჩევნო რეკლამას, არჩევნების მეორე ტურამდე ეთერში არ განათავსებდა, თუნდაც ეს ყოფილიყო კანონდარღვევა. აღნიშნულთან დაკავშირებით ირაკლი კობახიძემ კომუნიკაციების კომისიაში მთავარ არხს უჩივლა.

სხდომაზე მთავარი არხის პოზიციას მათი იურისტი, თამთა მურადაშვილი იცავდა. მისი განცხადებით, მათ კანონი არ დაურღვევიათ, რადგან საკუთარი პროტესტი სიჩუმით, ანუ რეკლამის არგანთავსებით გამოხატეს, რისი უფლებაც გამოხატვის თავისუფლებიs ფარგლებში მათ ჰქონდათ.