ლელოს გენერალური მდივანი, ბადრი ჯაფარიძე ამბობს, რომ მათი და ქართული ოცნების დამოკიდებულებები პროპორციულ სისტემასთან დაკავშირებით ერთმანეთის მსგავსია. TV პირველის ეთერში ჯაფარიძემ თქვა რომ ახლა მთავარი ამოცანა ვადამდელ არჩევნებზე შეთანხმებაა.

"ვთანხმდებით იმაზე, რომ ის, ანუ ვადამდელი არჩევნები უნდა ჩატარდეს შეცვლილი კომისიების დაყოვნების პრინციპით, როდესაც უკვე ოპოზიციური პარტიები იქნებიან კომისიებში წარმოდგენილი პარიტეტულად. ასევე, შეთანხმებული ვართ იმ ტექნოლოგიურ გაუმჯობესებაზე და იმ აუცილებელ ნაბიჯებზე, რომელიც უზრუნველყოფს იმას, რომ კარუსელების შესაძლებლობები დავიყვანოთ მინიმუმამდე. ასევე, ის, რომ ჩაყრა ბიულეტენების, გამოვრიცხოთ. ანუ, ასეთ ნაბიჯებზე ჩვენ ძალიან ახლოს ვართ ერთმანეთთან მე ვიტყოდი, მაგრამ, ეს ყველაფერი კარგავს ფასს, თუკი ჩვენ ვერ ვთანხმდებით ვადამდელი არჩევნების თარიღზე [...]

რაღა აზრი აქვს ვადამდელი არჩევნების სრულად პროპორციულობაზე შეთანხმებას, თუკი ჩვენ ახლავე არა გვაქვს პოლიტიკური განრიგი შეთანხმებული, როდის ჩატარდება ეს ვადამდელი არჩევნები?! ეს არის ახლა მთავარი ამოცანა", — განაცხადა ბადრი ჯაფარიძემ.

31 ოქტომბერს ჩატარებული საპარლამენტო არჩევნების შედეგებს ოპოზიცია არ აღიარებს. მათ არ მიიღეს მონაწილეობა მაჟორიტარული ოლქების მეორე ტურში და პროპორციული სიით მიღებულ მანდატებზეც უარს ამბობენ.

11 დეკემბერს მე-10 მოწვევის პარლამენტის პირველი სხდომა ჩატარდა, რომელსაც მხოლოდ ქართული ოცნება ესწრებოდა. 24 დეკემბერს ერთპარტიულმა პარლამენტმა საქართველოს მთავრობა დაამტკიცა.

პოლიტიკური კრიზისიდან გამოსასვლელად მმართველ პარტიასა და ოპოზიციას შორის მოლაპარაკებები აშშ-სა და ევროკავშირს ელჩების შუამავლობით მიმდინარეობს. მოლაპარაკების ერთ-ერთი საგანი სწორედ საარჩევნო სისტემის შეცვლაა. უკვე ჩატარდა მოლაპარაკების ოთხი რაუნდი. ქართული ოცნების აღმასრულებელი მდივანი, ირაკლი კობახიძე ვარაუდობს, რომ მომდევნო რაუნდი იანვრის შუა რიცხვებში ჩატარდება.

გაიგეთ მეტი: