ნეტფლიქსმა The Queen's Gambit-ში არამხოლოდ პერსონაჟის ისტორიაში გააცოცხლა ამბები ქართველი მოჭადრაკის გამოცდილებიდან, ჩვენი ქართველი მწერლის ლექსის სათაურიც მიითვისა. ეს ნახევრად ხუმრობით. ისე კი, 2020 წელს გამოსული სუპერპოპულარული სერიალის სახელი ჯერ კიდევ 1969 წელს დაარქვა ქართველმა მწერალმა, მთარგმნელმა და რედაქტორმა, მორის ფოცხიშვილმა, თავის ცნობილ ლექსს.

ლაზიერის გამბიტი

ჭადრაკის დაფად ქცეულ მიწაზე
არა აქვს დიდი სიცოცხლე პაიკს,
არა აქვს დიდი სიცოცხლე პაიკს,
მაგრამ პაიკი ოცნებობს მაინც.

დამუხტულია კეთილი სიბრძნით,
ემორჩილება დედოფლის კდემას, -
ყველა პაიკი მეფისთვის იბრძვის,
ყველა პაიკი მეფისთვის კვდება.

მაგრამ, ო, მაგრამ, ადრე თუ გვიან
მეფეს და პაიკს ერთ ყუთში ყრიან.
ერთ მცირე ყუთში ერთად თავსდება
აზრი,
ოცნება,
სიმართლე,
ჭორი...

არის უთუოდ რაღაც მსგავსება
ამ ჭადრაკსა და იმ ჭადრაკს შორის,
ჩვენ რომ ვთამაშობთ ყოველთვის, ყველგან
გულდაჯერებით და გამძაფრებით, -
დაფაზე რჩება პატარა სევდა,
პაიკის სევდა, სხვა არაფერი.

მორის ფოცხიშვილი, 1969

ეს ლექსი სიმღერის სახით ყველამ ვიცით, მაგრამ შეიძლება არც ისე ბევრმა ვიცოდით მისი სახელი რომ ლაზიერის გამბიტი იყო. ამის შესახებ On.ge-ის სერიალების ჯგუფში მთამთა ჩხაიძემ გაგვაგებინა.

საქართველოს პირველი არხის ოქროს ფონდში არსებობს 1972 წლის ვიდეოც, რომელშიც მორის ფოცხიშვილი სწორედ ამ ლექსს ასრულებს.

ასევე იხილეთ: