აჭარის უმაღლესი საბჭოს კომიტეტებში დღეს, 24 დეკემბერს მთავრობის თავმჯდომარეობის კანდიდატ თორნიკე რიჟვაძესა და მინისტრობის კანდიდატებს უსმენდნენ. რიჟვაძემ მინისტრთა კაბინეტი უცვლელი შემადგენლობით დატოვა. მისი თქმით, კრიზისის პერიოდში მთავრობის სტაბილურობა მნიშვნელოვანია.

"პირველი რიგის ამოცანაა, რომ ჩვენ ეპიდემიის მართვა გავაგრძელოთ. გარკვეული სტაბილიზაციის ნიშნები უკვე გამოიკვეთა და მნიშვნელოვანია, რომ მინიმალური დანაკარგებით შევძლოთ ამ გლობალური გამოწვევის დაძლევა. ამის პარალელურად არ უნდა დაგვავიწყდეს ეკონომიკა, რომელიც როგორც ქვეყნისთვის, ასევე აჭარის რეგიონისთვის არის პირველი რიგის ამოცანა და პრიორიტეტი. ამიტომ, ეკონომიკის აღდგენისა და გაჯანსაღების მიზნითაც ჩვენ გვმართებს მთელი რიგი ოპერატიული ღონისძიებების გატარება", — განაცხადა თორნიკე რიჟვაძემ.

მან, ასევე, კომიტეტებში მომავალი წლის გეგმებზე ისაუბრა. რიჟვაძის თქმით პანდემიის პირობებში დაწყებული პროექტები უნდა გაგრძელდეს.

სხდომას ოპოზიციის ერთადერთი წარმომადგენელი, ირაკლი ჩავლეიშვილი ესწრებოდა. კენჭისყრის პროცედურა უახლოეს დღეებში უნდა ჩაინიშნოს. მთავრობის დასამტკიცებლად 11 დეპუტატის მხარდაჭერაა საჭირო. აჭარის უმაღლეს საბჭოში კი მმართველ გუნდს საკონსტიტუციო უმრავლესობა აქვს.