საქართველოს პრემიერმინისტრის, გიორგი გახარიას თქმით, ქალებს მმართველობის დონეზე სრული მხარდაჭერა აქვთ, ინიციატივების გამოჩენა კი მათი პრეროგატივაა.

"სპეციალური პროგრამებია მიზნობრივი, თუ არ არის, მაშინ დავჯდეთ, მოიტანეთ და დაგეხმარებით. ვიცი, რომ ფერმერთა ასოციაციას ქალი ხელმძღვანელობს, სოფლის მეურნეობის კომიტეტის ხელმძღვანელი ქალია და ა.შ. მმართველობით დონეზე, როგორც ხედავთ, სრული მხარდაჭერა გაქვთ. ახლა ბურთი თქვენ, მოიტანეთ წინადადებები და მოგეხმარებით", — განაცხადა გახარიამ.

დღეს პარლამენტში მთავრობის დამტკიცების სხდომა მიმდინარეობს. პარლამენტში პრემიერმინისტრობის კანდიდატს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.