ლილო მოლის ადმინისტრაცია მთავრობას 26-27 დეკემბერს სავაჭრო ცენტრის გახსნის მოთხოვნით მიმართავს. ლილო მოლში ამბობენ, რომ ამით მეწარმეებს საქონლის გაყიდვის საშუალება მიეცემათ.

ლილო მოლის ადმინისტრაციის განცხადებით, სავაჭრო ცენტრში დასაქმებული ათასობით მეწარმე გაგებით მოეკიდა შექმნილ მდგომარეობას და საქმიანობა მთლიანად გადააწყო ამ გეგმით გათვალისწინებულ ვადებზე და რადგან იყო პირობა 24 დეკემბრიდან 2 იანვრის ჩათვლით სავაჭრო სექტორისათვის შეზღუდვების მოხსნაზე, მეწარმეებმა ასობით მილიონი ლარის ღირებულების ზამთრის სეზონის საქონელი და საახალწლო პროდუქცია შემოიტანეს.

"საკოორდინაციო საბჭოს გუშინდელმა გადაწყვეტილებამ, რომელიც ჩვენთვის არის აუხსნელი და გაუგებარი, გამოავლინა დისკრიმინაციული ხასიათი ამ სექტორში დასაქმებულ მეწარმეთა ერთი ნაწილის ათასობით სუბიექტის მიმართ, რომლებიც დადგნენ იმ საშიშროების წინაშე, რომ მათ მიერ შემოტანილი საქონელი საერთოდ დარჩეს გაუყიდავი ფაქტიურად ერთი წლის მანძილზე, რაც შესაძლებელია მათი საქმიანობის დასასრულის წინაპირობად იქცეს", — აღნიშნულია განცხადებაში.

ლილო მოლის ადმინისტრაციის თქმით, წინასაახალწლო ერთი კვირა არ იძლეოდა იმის შესაძლებლობას, რომ ბიზნესს მიეღო ამ პერიოდისათვის ჩვეული მოგება, მაგრამ ეს აუცილებელი ჟანგბადის მიწოდება მეწარმეებისთვის და მომავალი წლის პირველი ურთულესი თვეების განმავლობაში სრული განადგურებისგან დაცვისა და გადარჩენის საშუალება იქნებოდა

ლილო მოლის ადმინისტრაცია იმედოვნებს, რომ იანვარში დაგეგმილი შეზღუდვების მოხსნის დროსაც გადაწყვეტილებას ანალოგიურად არ მიიღებენ და მათთან დასაქმებულ მეწარმეებსაც გაითვალისწინებენ.

24 დეკემბრიდან ძალაში რჩება მუნიციპალური ტრანსპორტის შეზღუდვა დიდ ქალაქებში — თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში. ასევე, შეზღუდვები რჩება საქალაქთაშორისო ტრანსპორტთან დაკავშირებით. არ გაიხსნება ბაზრობები და იმუშავებენ მხოლოდ აგრარული ბაზრობები.

ზემოთ ჩამოთვლილ დიდ ქალაქებში დაშვებული იქნება სავაჭრო ობიექტების მუშაობაც, თუმცა დამატებითი რეგულაციების პირობებში. კერძოდ, სამუშაო საათები განისაზღვრება დილის 7 საათიდან საღამოს 7 საათამდე. მაღაზიის ფართის ყოველ 20 კვადრატულ მეტრზე დაშვებული იქნება ერთი მომხმარებელი. შიდა და გარე სივრცეში რიგები უნდა გაკონტროლდეს. ფასდაკლებების აქციები უნდა გამოცხადდეს ან დილის საათებში, ან ონლაინგაყიდვების დროს. ამის მიზეზი კი, როგორც ცქიტიშვილმა თქვა, ისაა, რომ მაღაზიაში ბევრი ადამიანის კონცენტრაცია არ მოხდეს.

დამატებითი შეზღუდვები შეეხება ტანსაცმლის მაღაზიებსაც, სადაც გასახდელები აღარ იმუშავებს. გარდა ამისა, ცქიტიშვილი ამბობს, რომ მაღაზიებმა პროდუქციის დაბრუნება ან გადაცვლა უნდა დაუშვან ერთი თვის ვადაში და ეს უნდა მოხდეს მხოლოდ პირველი თებერვლის შემდეგ. სავაჭრო ცენტრებში იკრძალება კვების ობიექტების ფუნქციონირება, მათ შორის გატანის სერვისით.