პარლამენტმა პირველი მოსმენით მიიღო რეგლამენტის ცვლილებები, რომლის თანახმადაც დეპუტატი, რომელიც მთელი თვე ყველა პლენარულ სხდომას გააცდენს, ხელფასს ვერ მიიღებს. აქამდე არსებული რეგულაციებით მათ მაქსიმუმ 50% ეჭრებოდათ.

"დღეს საქართველოს პარლამენტის რეგლამენტი ითვალისწინებს დეპუტატის ხელფასის დაკავებას მთელ რიგ შემთხვევაში, თუ არ ესწრება საკომიტეტო სხდომას არასაპატიო მიზეზით, პლენარულ სხდომას და არის ხელფასის 10-დან მაქსიმუმ 50%-მდე. იმ შემთხვევაში, როდესაც პარლამენტის წევრი არასაპატიიო მიზეზით გააცდენს ყველა პლენარულ სხდომას, შემოგვაქვს ინციიატივა, რომ ხელფასი სრულად დაუკავდეს", — განაცხადა ოხანაშვილმა.

ოხანაშვილის თქმით, პროექტში საუბარია იმაზეც, არდადეგების პერიოდში როგორ უნდა დარეგულირდეს საკითხი, თუმცა ჯერ გადაწყვეტილი არ არის.

"თუკი არდადეგებამდე კალენდარული თვის განმავლობაში ყველა პლენარულ სხდომას გააცდენს, ასევე, ხელფასი დაუკავდეს სრულად, არდადეგების პერიოდში. თუმცა, იყო მოსაზრება ეს რამდენად სამართლიანია, ამიტომ ეს საკითხი ღიად არის დატოვებული".

ოხანაშვილის განმარტებით, ეს არ ეხება ბოიკოტის გამო გაცდენილ სხდომებს, რადგან ბოიკოტი რეგლამენტით მინიჭებული უფლებაა და საპატიო მიზეზად მიიჩნევა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.