პოლიციამ ორკაციანი ჯგუფი დააკავა, რომლებიც რუსთავსა და გარდაბანში მდებარე მიკროსაფინანსო ორგანიზაციებს ატყუებდნენ. ისინი ლომბარდში ნამდვილის ნაცვლად ყალბ ოქროს ინახავდნენ და ნაღდ ფულს იღებდნენ.

ამ გზით მათ კომპანიებს ჯამში 59 870 ლარი დასტყუეს.

ეჭვმიტანილების ბინისა და მანქანის ჩხრეკისას პოლიციამ წაღებული ფული სრულად (ნივთმტკიცებად) ამოიღო.

ახლა მათ ჯგუფურად ჩადენილ დიდი ოდენობით თაღლითობას ედავებიან, რაც 9 წლამდე პატიმრობას ითვალისწინებს.

"შინაგან საქმეთა სამინისტროს ქვემო ქართლის პოლიციის დეპარტამენტის გარდაბნის რაიონული სამმართველოს თანამშრომლებმა, წინასწარი შეთანხმებით ჯგუფის მიერ დიდი ოდენობით თაღლითობის ბრალდებით, 2 პირი დააკავეს.

გამოძიებით დადგინდა, რომ ბრალდებულები რუსთავსა და გარდაბანში მდებარე მიკროსაფინანსო ორგანიზაციაში, სხვადასხვა დროს მოტყუებით, ყალბ ოქროს ნივთებს ალომბარდებდნენ და თანხას თაღლითურად ეუფლებოდნენ.

მიკროსაფინანსო ორგანიზაციებისთვის მიყენებულმა ზარალმა ჯამში 59 870 ლარი შეადგინა.

სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულის ჩამდენი პირები ბრალდებულის სახით დააკავეს, ხოლო დაკავებულების კუთვნილი ავტომანქანისა და საცხოვრებელი ბინის ჩხრეკის შედეგად მართლსაწინააღმდეგოდ დაუფლებული თანხა ნივთმტკიცებად ამოიღეს.
გამოძიება სისხლის სამართლის კოდექსის 180-ე მუხლის მე-2 ნაწილის "ა" და მე-3 ნაწილების "ბ" ქვეპუნქტებით მიმდინარეობს, რაც 9 წლამდე ვადით თავისუფლების აღკვეთას ითვალისწინებს", — წერია უწყების განცხადებაში.