ბოლო ორი წლის განმავლობაში ისრაელში კიდევ ერთი, რიგით მეოთხე საპარლამენტო არჩევნები ჩატარდება, რადგან კოალიციურმა მთავრობამ 2021 წლის სახელმწიფო ბიუჯეტი ვერ შეათანხმა. BBC-ის ინფორმაციით, სამშაბათს, 22 დეკემბერს ბიუჯეტის დამტკიცებისთვის ყველა ვადა ამოიწურა და კანონის თანახმად, პარლამენტი დაშლილად გამოცხადდა.

ისრაელის პარლამენტში, ქნესეთში დეპუტატები ბიუჯეტის განხილვის ვადების გახანგრძლივებისთვის შესაბამის კანონპროექტსაც განიხილავდნენ, თუმცა ხმათა უმრავლესობით პროექტი უარყოფილ იქნა. მორიგი საპარლამენტო არჩევნები 2021 წლის 23 მარტს გაიმართება.

2019 წლის სექტემბრიდან 2020 წლის მარტის პერიოდში ისრაელში სამი არჩევნები ჩატარდა, რომელზეც მილიარდ შეკელზე (300 მილიონ დოლარზე) მეტი უკვე დაიხარჯა. კოალიციური მთავრობის ჩამოყალიბება მხოლოდ მესამე მცდელობაზე გახდა შესაძლებელი. პრემიერმინისტრ ბენიამინ ნეთანიაჰუს მმართველმა პარტია ლიკუდმა შეძლო და კოალიციური მთავრობა ჩამოაყალიბა მთავარ ოპონენტთან კახოლ-ლავანთან, რომლის ლიდერიც ბენი განცია.

კოალიციური შეთანხმების თანახმად, პრემიერის პოსტს მმართველობის პირველ 18 თვეში ნეთანიაჰუ დაიკავებდა, ხოლო 2021 წლის ნოემბრიდან — განცი. ამ მომენტისთვის განცს თავდაცვის მინისტრის პოსტი ეკავა. თუმცა როგორც აღმოჩნდა, ნეთანიაჰუ-განცის კოალიციამ მხოლოდ რამდენიმე თვე გაძლო.

ბენიამინ ნეთანიაჰუს პრემიერის პოსტი 1996-99 წლებში ეკავა, ხოლო 2009 წლიდან ის უცვლელი ლიდერია, რაც ისრაელის ისტორიაში რეკორდული მაჩვენებელია. ამ ეტაპისთვის, მას კორუფციაში ადანაშაულებენ და მის წინააღმდეგ გამოძიებაც კი მიმდინარეობს, თუმცა ნეთანიაჰუ ბრალს არ აღიარებს და იმედოვნებს, რომ პრემიერის პოსტს კიდევ ერთხელ დაიკავებს.

პარლამენტის დაშლასა და ახალი არჩევნების ჩატარებაში განცი და ნეთანიაჰუ ერთმანეთს ადანაშაულებენ.

"მე არ მსურდა არჩევნები, ლიკუდს არ სურდა ეს არჩევნები. ყოველ ჯერზე ვცდილობდით, რომ ეს არ დაგვეშვა, მაგრამ ბენი განცმა უარი თქვა ჩვენთან შეთანხმებაზე", — განაცხადა ნეთანიაჰუმ.

თავის მხრივ, განცი აცხადებს, რომ პრემიერს სურდა სიტუაცია არჩევნებამდე მიეყვანა, რათა კორუფციაში ბრალდება თავიდან აერიდებინა.