გიორგი გვიმრაძემ დატოვა საზოგადოებრივი მაუწყებლის ახალი და მიმდინარე ამბების ბლოკის დირექტორის პოსტი. ინფორმაცია რადიო თავისუფლებამ გაავრცელა.

გვიმრაძე ამ პოზიციას 2015 წლის ოქტომბრიდან იკავებდა. რადიო თავისუფლების ცნობით, მაუწყებლის კომუნიკაციების სამსახურში არ აზუსტებენ მისი გადაწყვეტილების მიზეზს.

გვიმრაძეს, მაუწყებლის ახალი ამბების ბლოკის დირექტორობის გარდა, მიჰყავდა გადაცემა "42-ე პარალელი".

4 დეკემბერს, მან Facebook პოსტში დაწერა, რომ ის პასუხისმგებელია ინტერვიუზე კიმბერლი ლოუსთან, რომელიც საზოგადოებრივმა მაუწყებელმა საზოგადოებას გააცნო, როგორც აშშ-ის მომავალი პრეზიდენტის ადმინისტრაციის შესაძლო წარმომადგენელი ევროკავშირში — ეს ინფორმაცია არ დასტურდება, თუმცა პროპაგანდისტულმა მედიამ სახელისუფლებო მიზნებისთვის გამოიყენა.

"ქალბატონ კიმბერლი ლოუს ვესაუბრე მე პირადად და არ თქმულა რომ ის არის მომავალი ადმინისტრაციის წარმომადგენელი, ის შეიძლება გახდეს, რასაც თავად ამბობს ამ ეტაპზე მხოლოდ. და სწორედ ამიტომ, ითქვა რომ შესაძლოა იყოს. თუმცა ის რომ რესპუბლიკური პარტიის წევრია და თან კენჭს იყრიდა სენატში ეს ადვილად იძებნება. მისი კავშირები, ტრამპის მომავალი ადმინისტრაციის უკვე დასახელებულ წევრებთან, ასევე იძებნება. ამის გარდა, ქალბატონი კიმბერლი, არაფერს ამბობს ისეთს რაც არ უთქვამს ტრამპთან დაახლოებულ სხვა ადამიანებს. ამდენად მისი გამონათქვამები, დიდწილად თანხვედრაშია ტრამპის პოლიტიკის ძირითად გზავნილებთან და ეს არის მნიშვნელოვანი. შესაბამისად, ამ ინტერვიუს გარკვეული ნაწილების გამოქვეყნებაზე, პასუხისმგებელი ვარ მე და მხოლოდ მე და არავინ ჩემს გარდა.", — დაწერა გვიმრაძემ.