POSTV-ის ეთერში შალვა რამიშვილმა განაცხადა, რომ თავის შვილებთან ურთიერთობა არ აქვს, რაც, როგორც ამბობს, "ბულინგის შედეგია". ასევე, ქართული ოცნების პროპაგანდისტმა თქვა, რომ შვილებზე მეტად არავინ უყვარს, მაგრამ "ასე მოხდა".

ამ განცხადებას მისი შვილი, ლაშა რამიშვილი, გამოეხმაურა. ის სოციალურ ქსელ ფეისბუკში მამას წერილით მიმართავს:

"პათეტიკური პროპაგანდისთვის ჩვენი გამოყენებაა სიყვარული? არ არსებობს შენში სიყვარული, ეს სიტყვაც კი ბინძურდება შენი პირიდან თქმული. სიყვარული ჩემს ოჯახშია, ჩემს ახლობლებში, იმ ხალხში, ვინც გარეთ იბრძვის დღეს. თქვენი სისტემით გაღატაკებული და სულამოხდილი ხალხი, უღირსი ხელფასებით რომ უწევთ ოჯახის რჩენა. ძარცვით და ყაჩაღობით რომ ხართ გამდიდრებულები, ამიტომ არ არსებობს აქ მხარე, აპათიის წინააღმდეგ ყოფნა ყოველთვის იქნება სწორი. ჩემს ოჯახს გაჭირვებაც უგრძნია და მშივრებსაც დაგვიძინია, მაგრამ არცერთი წამით გვინანია სიმართლის თქმა. ტანჯულია ხალხი და ბოროტება სუფევს ქვეყანაში, მე კი ჩემს პრინციპებზე დგომა სიკვდილადაც მიღირს.

ნუ გვამცირებ, თითქოს ჩვენი განცდები არ იყოს გულწრფელი, ნუ მანიპულირებ ჩვენი სახელით, ბულინგი სწორედ ეს არის. არ გაგაჩნია შენ სიყვარული და ამიტომაც ხარ და იქნები მარტო. თავისუფლებას მხოლოდ შიში კლავს.

გაბედეთ და გაემიჯნეთ უსამართლობას ყველა, აღარ აქვთ ამათ უკან დასახევი გზა, ვეღარ დაუბრუნდებიან ჩვეულ დღის წესრიგს. ეს იციან და ამის ეშინიათ. გამოდით და გაიფიცეთ. ამით გარდაუვალს დააჩქარებთ", — წერია პოსტში.