თვალჭრელიძის ქუჩაზე მცხოვრები ვახტანგ ფიფია, რომლის შვილის სახლიც დღეს მერიამ დაანგრია, ამბობს, რომ ამ ტერიტორიაზე უნებართვო მშენებლობას 13-წლიანი ისტორია აქვს და აქამდე გაფრთხილება არ მიუღიათ. ფიფიას თქმით, განცხადება ფანჯარაზე 17 დეკემბერს გააკრეს და გააფრთხილეს, რომ თუ ორ დღეში არ წარადგენდნენ საკუთრების დამადასტურებელ დოკუმენტაციას, სახლს დაანგრევდნენ.

"13 წლის ისტორია აქვს ამას, გუშინდელი მიტაცებული კი არ არის და გუშინწინდელი. აქ გვედგა ჩვენ სახლი, დაფიქსირებული იყო, განცხადება შეტანილი გვქონდა დაკანონებაზე, მაგრამ არ გადაწყდა მომენტალურად, გაგრძელდა, გაგრძელდა... მერე იმას მივამატეთ, ჩემს შვილს სამი შვილი ჰყავს, ბავშვები. ოჯახი უნდა გამოეყოს. მაქვს მე სახლი, მაგრამ პატარა სახლია, ჩვენ ბებრები ვცხოვრობთ, 76 წლის ვარ, პენსიონერი. არაფერი წინააღმდეგობა არ იყო, არავისგან, არც წერილობითი, არც სიტყვიერი. რომ ყოფილიყო, ჩვენ გიჟები კი არა ვართ კაცო", — ამბობს ფიფია.

მისივე ინფორმაციით, სახლების დანგრევა მერიამ დღეს, დილის 6-ზე ან 7-ზე დაიწყო.

"ეძინა ხალხს და დაესხნენ თავს, დრო არავის დაუფიქსირებია, მაგრამ 7 იყო მგონი დაწყებული. გავიტან რაღაცებსო უთქვამს ჩემს შვილს, მაგრამ არ დააცადეს, გააგდეს გარეთ", — ამბობს ის.

კიდევ ერთი მოქალაქე აღნიშნავს, რომ დაუნგრიეს სახლი, სადაც 7 ადამიანი ცხოვრობს, მათ შორის, ბავშვები, რომლებსაც ეძინათ.

"დღისით ვერ დაანგრევდნენ?! არ არის ეს ქვეყანა. ჩვენ ძალიან კარგად ვიყავი, სადაც ვიყავით, აფხაზეთში. ვისი ბრალია, დღეს აქ რომ ვართ, მათხოვრები რომ ვართ?! 45-ლარიანი შემწეობა გვაქვს და იკმარეთო. 45 ლარით იცხოვრებს ადამიანი?! წადი ბაზარში, თუ იყიდი რამეს 45 ლარით. რამდენი ნგრევა უნდა გადავიტანოთ, რამდენჯერ? პირველი ხომ არ არის ეს. ხომ უნდა გაითვალისწინონ რაღაც, ან პატარა ბავშვები, ან მოხუცები, გული არ აქვთ?! რა ვქნათ ჩვენც ამ სიცივეში, ამ ყინვაში? სად წავიდე, სად წავიყვანო ეს ბავშვები. სხვა საცხოვრებელი არ გვაქვს", — თქვა მან On.ge-სთან.

ფოტო: On.ge/ავთო შერვაშიძე

დღეს, 23 დეკემბერს, მერიის წარმომადგენლებმა თვალჭრელიძის ქუჩაზე უნებართვოდ აშენებული სახლები დაანგრიეს.

მანამდე, 18 დეკემბერს თბილისის მერიაში განაცხადეს, რომ სამგორის რაიონში, თვალჭრელიძის ქუჩის მიმდებარედ, სახელმწიფო მიწაზე 7 უკანონო მშენებარე შენობა-ნაგებობა დააფიქსირეს. მათი ინფორმაციით, ინსპექციის თანამშრომლებმა, ვინაიდან მაცხოვრებლები ტერიტორიაზე არ იმყოფებოდნენ, ობიექტებზე გამაფრთხილებელი მოთხოვნები გამოაკრეს და იქ მაცხოვრებლებს მოუწოდეს, განეხორციელებინათ მშენებლობების დემონტაჟი. წინააღმდეგ შემთხვევაში კი თბილისის მუნიციპალური ინსპექცია შენობა-ნაგებობების დემონტაჟს აანონსებდა.