პრემიერმინისტრობის კანდიდატ გიორგი გახარიას განცხადებით, მთავრობის შემადგენლობის დატოვება სრულად ლოგიკურია, რადგან მისივე თქმით, მთავრობა ეფექტურად მუშაობს.

"რა თქმა უნდა, მთავრობის სრული შემადგენლობის დატოვება არის სრულად ლოგიკური, როგორც ჩემი გადმოსახედიდან, ასევე, დარწმუნებული ვარ ჩვენი მოქალაქეების გადმოსახედიდანაც. პირველ რიგში, იმიტომ, რომ კრიტიკული მიმართულების თვალსაზრისით ეს მთავრობა თავის ძირითად ფუნქციებს ეფექტურად ახორციელებს. მეორე, ბევრი მიმართულებით მთავრობაში სისტემური რეფორმები დაწყებულია. ეს იქნება ჯანდაცვა, განათლება", — განაცხადა გახარიამ პარლამენტში, ფრაქცია ქართული ოცნების წევრებთან შეხვედრისას.

გახარიამ ფრაქცია ქართული ოცნების სხდომაზე პარლამენტში თქვა, რომ ინფრასტრუქტურისა და ეკონომიკის სამინისტროში სერიოზული პროექტები რეფორმებია დაწყებული და ის ლოგიკურ დასასრულამდე უნდა მივიდეს.

ამიტომ, მისთვის გაურკვეველია ერთი არგუმენტი მაინც, რატომ უნდა მომხდარიყო ცვლილება მთავრობის შემადგენლობაში.

გახარიამ მთავრობის შემადგენლობის ახალი სია, 18 დეკემბერს, წარადგინა. მან მინისტრთა კაბინეტის შემადგენლობა არ შეცვალა. სიის მიხედვით, იცვლება მხოლოდ იუსტიციის მინისტრი, რადგან თეა წულუკიანი საპარლამენტო არჩევნებამდე გადადგა და საქმიანობას საკანონმდებლო ორგანოში აგრძელებს.

დღეს პარლამენტში ფრაქცია ქართული ოცნების სხდომა მიმდინარეობს. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.