დაავადებათა კონტროლის ცენტრის ხელმძღვანელის მოადგილის, პაატა იმნაძის თქმით, კორონავირუსის ახალი შტამი, რომელიც დიდ ბრიტანეთში გამოვლინდა კლინიკურად არაფრით განსხვავდება, მაგრამ ადვილად გადამდებია. ამის შესახებ მან რუსთავი 2-ის ეთერში ისაუბრა.

როგორც მან განაცხადა, ვირუსის ახალი შტამი საქართველოში ჯერ არ დაფიქსირებულა, თუმცა რამდენიმე შემთხვევას იკვლევენ.

"არაფრით არ განსხვაბვდება კლინიკურ მიმდინარეობაში, პირიქით, რაღაც ისეთი ისიც გამოჩნდა, რომ შეიძლება მსუბუქადაცა მიდიოდეს, მაგრამ ის ადვილად გადაიდება. ანუ უფრო მეტად ინფექციურია, ვიდრე ჩვეულებრივი, დღემდე მოტრიალე. თუმცა ეს პირველი მუტაცია არ არის, რომელმაც ამ შტამის ინფექციურობა შეცვალა", — აღნიშნა იმნაძემ.

14 დეკემბერს დიდი ბრიტანეთის ჯანდაცვის მინისტრმა განაცხადა, რომ აღმოაჩინეს COVID-19-ის ახალი შტამი, რომელიც უფრო სწრაფად ვრცელდება. ამის გამო ზოგიერთმა ქვეყანამ ბრიტანეთთან საჰაერო მიმოსვლა უკვე შეაჩერა. ამასთან, საქართველოში ბრიტანეთიდან შემოსული ან ბოლო 2 კვირაში იქ ნამყოფი პირებისთვის სავალდებულო კარანტინი დაწესდა.