აფრიკის დასახლებაში მცხოვრები 8 წლის გიგი ჩანგელიას ოჯახს, როგორც დევნილის სტატუსის მქონეს, ბინა გადასცეს, თუმცა, ამ დრომდე მათ მაინც აფრიკის დასახლებაში უწევთ დარჩენა. ბინის გადაცემასთან დაკავშირებით დღეს მერიაში გამართულ ბრიფინგზე დევნილთა, ეკოემიგრანტთა და საარსებო წყაროებით უზრუნველყოფის ხელმძღვანელმა, ბესარიონ სიმონიშვილმა განაცხადა.

"2020 წლის ნოემბერში დევნილთა საკითხების შემსწავლელმა კომისიამ განიხილა ჩანგელიების ოჯახის დაკმაყოფილების საკითხი. ოჯახი რეგისტრირებულია ზუგდიდის მუნიციპალიტეტის სოფელ რუხში. 30 ნოემბერს სააგენტომ ხუთსულიან დევნილ ოჯახს ოფიციალურად შესთავაზა ზუგდიდში, ბარამიას ქუჩაზე ევროპული სტანდარტების შესაბამისად აშენებულ საცხოვრებელ ფართში ბინა. 1 დეკემბერს ოჯახმა წერილობით ოფიციალურად დაგვიდასტურა ბინის მიღება. 7 დეკემბერს სააგენტომ გამოაქვეყნა დევნილი ოჯახების სია, მათ შორის, იყო ჩანგელიების ოჯახი. 12-13 დეკემბერს ზუგდიდში, ბოტანიკურ ბაღში, გაიმართა კენჭისყრა და გამოცხადდა ჩანგელიების ოჯახიც. იქიდან გამომდინარე, რომ ოჯახის სრულწლოვანი წევრი არ იყო ადგილზე, ვერ გადავეცით გასაღები. ყველა სრულწლოვანმა უნდა მოაწეროს მიღება-ჩაბარების აქტს ხელი და გადაეცემა კუთვნილი ბინა", — განაცხადა ბესარიონ სიმონიშვილმა.

ჩანგელიების ხუთსულიანი ოჯახისთვის საცხოვრებელი ფართის გადაცემის საკითხში ჩართულია არასამთავრობო ორგანიზაცია პარტნიორობა ადამიანის უფლებებისთვის. როგორც ორგანიზაციის აღმასრულებელმა დირექტორმა, ანა არგანაშვილმა განაცხადა, ამ დროისთვის ოჯახს ბინა ჯერ კიდევ არ აქვს.

"ბინის გადაცემის პროცესი დაწყებულია დეკემბერში, მაგრამ დასრულებული არ არის. ჩვენი მოლოდინია, რომ ეს სახლი არ დაინგრეს მანამ, სანამ გასაღები არ გადაეცემა ოჯახს და მანამ, სანამ არ აუნაზღაურდება ის სესხი, რითიც ეს სახლი ააშენა. მოლოდინი გვაქვს, რომ შეცვალოს კალაძემ თავისი მიდგომები და ღარიბ ხალხს არ დაუნგრიოს ბულდოზერებით თავისი ნაშრომი", — განაცხადა ანა არგანაშვილმა.

ჩანგელიების მრავალსულიანი ოჯახი ერთ-ერთია მათ შორის, ვინც აფრიკის დასახლებაში ცხოვრობს და სხვა თავშესაფარი არ გააჩნია. საწინააღმდეგოს ამტკიცებს მერია და დღეს გამართულ ბრიფინგზე კიდევ ერთხელ აღნიშნეს, რომ "იმ მცხოვრებთა ძირითად ნაწილს აქვს თავზე ჭერი დედაქალაქში თუ სხვა რეგიონებში".

"ჩვენ მართლა არ გვაქვს არანაირი საცხოვრებელი. ისე მპირდებიან, 28 წელია, მპირდებიან. ჯერჯერობით მართლა არ მაქვს ბინა, თორემ, რომ მქონოდა, ამ პირობებში არავის უხარია ცხოვრება. ეს არის ინვალიდობის პენსიით და ვალით გაკეთებული სახლი", — განაცხადა გიგი ჩანგელიას დედამ.

15 დეკემბერს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დააკავეს 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებას. პასუხად ადგილობრივებმა განაცხადეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

ამავე თემაზე: