საქართველოს მე-9 მოწვევის პარლამენტის ყოფილმა წევრმა, სანდრა რულოვსმა, საინფორმაციო სააგენტო On.ge "სიცრუისა და დეზინფორმაციის" ტირაჟირებაში დაადანაშაულა მას შემდეგ, რაც ჩვენ გამოვაქვეყნეთ სტატია სათაურით "სანდრა რულოვსმა პარლამენტში ხელფასიც აიღო და დანამატიც ".

ჩვენთვის მიუღებელია მსგავსი ბრალდება, რადგან ჩვენ მიერ 26 იანვარს გამოქვეყნებული ინფორმაცია ეყრდნობოდა საქართველოს პარლამენტიდან საჯარო ინფორმაციის სახით მიღებულ დოკუმენტაციას. დოკუმენტს თან ახლავს დანართი, რომელიც დასათაურებულია შემდეგნაირად: "საქართველოს IX მოწვევის პარლამენტის წევრების შემოსავალი 2016 წლის 18 ნოემბრიდან 31 დეკემბრის ჩათვლით". ერთ გრაფაში აღნიშნულია თანამდებობრივი სარგოს ოდენობა, მეორეში კი - დანამატი. სწორედ ამ დოკუმენტში წერია, რომ დეპუტატს, რომელსაც უფლებამოსილება პარლამენტის პირველივე პლენარულ სხდომაზე შეუწყდა, დარიცხული აქვს თანამდებობრივი სარგო 666,67 ლარი, ხოლო დანამატი - 1007,92 ლარი.

საქართველოს პარლამენტიდან მიღებული საჯარო ინფორმაცია.

On.ge-მ 26 იანვარს ასევე გამოაქვეყნა ინფორმაცია სხვა პარლამენტარების მიერ მიღებული ხელფასებისა და დანამატების შესახებ, რომელთა ჯამურმა ოდენობამ 625 ათას ლარს მიაღწია.

სანდრა რულოვსმა, აღნიშნული სტატიის გამოქვეყნების შემდეგ გამოაქვეყნა გადარიცხვის დამადასტურებელი დოკუმენტი, რომლის მიხედვითაც, პარლამენტიდან მისთვის დარიცხული თანხა გადაერიცხა ბავშვთა ჰოსპისს.

გთავაზობთ რულოვსის განმარტებას უცვლელად:

"დღეს გავრცელდა ინფორმაცია, რომ თითქოს მე მივიღე დეპუტატის ხელფასი და დანამატი. ეს არის სრული სიცრუე და დეზინფორმაცია! მოგეხსენებათ მე-9 მოწვევის პარლამენტის პირველი სხდომა ჩატარდა 2016 წლის 18 ნოემბერს და ამავე დღეს საქართველოს პარლამენტში შევიდა ჩემი პირადი განცხადება უფლებამოსილების შეწყვეტის მოთხოვნით. აღნიშნული საკითხის განხილვა და უფლებამოსილების შეწყვეტა მოხდა 2016 წლის 1 დეკემბერს. მოგვიანებით ჩემთვის ცნობილი გახდა, რომ უფლებამოსილების შეწყვეტამდე ჩემმა, როგორც დეპუტატის ხელფასმა შეადგინა 1339 ლარი. ჩემი თხოვნით ეს თანხა სრულად გადაერიცხა საქველმოქმედო ფონდ ააიპ “ბავშვთა ჰოსპისს”, რომლის მიზანია პალიატიური მზრუნველობის საჭიროების მქონე ბავშვთა ცხოვრების ხარისხის გაუმჯობესება და მათზე ზრუნვა. აღნიშნულს ადასტურებს გადარიცხვის დამადასტურებელი დოკუმენტაცია.

ჟურნალისტები, რომლებიც მსგავსი ტყუილების ტირაჟირებით არიან დაკავებულები მეტი პასუხისმგებლობით უნდა ეკიდებოდნენ თავიანთი პროფესიული მოვალეობის შესრულებას და უმჯობესი იქნებოდა გაეშუქებინათ ბავშთა ჰოსპისის საქმიანობა, თუ რამდენად მნიშვნელოვან როლს თამაშობს ის განუკურნებელი დაავადების მქონე ბავშვებისათვის".

On.ge დაფუძნების დღიდან ხელმძღვანელობს ჟურნალისტური ეთიკის პრინციპებით და ჩვენთვის მნიშვნელოვანია ზუსტი, სანდო ინფორმაციის გავრცელება.