აშშ-ის სახელმწიფო მდივნის, მაიკ პომპეოს განცხადებით, აშშ-ზე კიბერთავდასხმის უკან რუსეთი დგას. როგორც უცხოური პრესა წერს, პომპეომ ეს ერთ-ერთ რადიოსთან ინტერვიუს დროს თქვა.

"ჩვენ შეგვიძლია საკმაოდ ნათლად ვთქვათ, რომ სწორედ რუსები მონაწილეობდნენ ამ საქმეში", — თქვა პომპეომ.

დამატებითი დეტალები რუსეთის ბრალეულობის შესახებ პომპეოს არ გაუჟღერებია. აშშ-ში ამბობენ, რომ ეს კიბერთავდასხმა სერიოზულ საფრთხეს შეიცავდა სახელმწიფოსთვის.

The Guardian წერს, რომ პომპეო ტრამპის ადმინიტრაციის პირველი წევრია, ვინც ამ საკითხზე ღიად ისაუბრა და ტრამპს ჯერ კომენტარი არ გაუკეთებია.

ინფორმაცია კიბერთავდასხმის შესახებ აშშ-ის მთავრობამ დაახლოებით ერთი კვირის წინ გაავრცელა. მათი გავრცელებული ინფორმაციით, თავდასხმის სამიზნე გახდა შინაგან საქმეთა სამინისტრო და სააგენტო, რომელიც აკონტროლებს ამერიკული ბირთვული იარაღის არსენალს.