ამერიკაში ბავშვმა App Store-დან გადმოწერილი Sonic Forces-ის თამაშ-თამაშით 16 000 დოლარი დახარჯა, თუმცა კომპანია Apple მშობლისთვის თანხის დაბრუნებას არ აპირებს.

6 წლის ჯორჯმა თამაში დედის iPad-ში დაიწყო და ყველაფერი რიგზე იყო, სანამ ბიჭი თამაშის პარამეტრების შემოწმებას გადაწყვეტდა. პერფორმანსის გაუმჯობესების ფუნქციამ თამაში უფრო ამაღელვებელი გახადა, თუმცა ფასიანი პროდუქტები 2-დან 100 დოლარამდე ღირს. მან ერთ დღეს 2 500 დოლარის ღირებულების პროდუქტები შეიძინა.

ბიჭის დედამ ვერაფრით გაიგო საკრედიტო ბარათიდან თანხის ჩამოჭრა და ბანკს აცნობა შესაძლო თაღლითობის შესახებ. ბანკს ოთხი თვე დასჭირდა იმის გასარკვევად, რომ თანხა მომხმარებლის პირადი Apple-ის ანგარიშიდან Sonic Forces-ზე დაიხარჯა.

ამ დროისთვის, ეფლის მიერ თანხის დაბრუნების 60-დღიანი ვადა უკვე გასული იყო.

"მათ მითხრეს, რომ რადგან 60 დღის ვადაში არ დავრეკე, ვერაფერს იზამდნენ. იმიტომ არ დავრეკე, რომ ეს ყოველივე თაღლითობად ჩავთვალე", — ამბობს შვილის მიერ დაზარალებული მშობელი.

Apple ამბობს, რომ დედ-მამას შეეძლო მშობლის კონტროლის ფუნქცია გაეაქტიურებინა და მსგავსი შემთხვევებისგან თავი დაეზღვია.

"ამ ფუნქციის არსებობის შესახებ ინფორმაცია რომ მქონოდა, გავააქტიურებდი და ჩემს 6 წლის შვილს თანხის "განიავების" საშუალებას არ მივცემდი. მსგავსი თამაშები ხაფანგია, ბავშვებს სხვადასხვა ფუნქციის ყიდვისკენ უბიძგებენ, რომელი ზრდასრული დახარჯავს 100 დოლარს ვირტუალურ ოქროს მონეტებზე?" — ამბობს იმედგაცრუებული მშობელი.

ჯორჯის მშობლები ამბობენ, რომ საკუთარი ისტორიის გაზიარება სხვა მშობლების დასახმარებლად გადაწყვიტეს:

"შეამოწმეთ დაცვის პარამეტრები. ისიც კი მაშფოთებს, მსგავს თამაშებს მსგავსი ფუნქცია რომ აქვთ. Apple-ის მოწყობილობები ისე არ არის დაპროგრამებული, რომ მსგავსი შემთხვევები არ მოხდეს".