თავდაცვის ყოფილი მინისტრი, თინა ხიდაშელი სააპელაციო სასამართლოს გადაწყვეტილებას, ე.წ. კაბელების საქმესთან დაკავშირებით, საკუთარი ფეისბუკის გვერდზე ეხმაურება.

ხიდაშელი მიიჩნევს, რომ სსკ-ის 332-ე მუხლის ერთ-ერთი ყველაზე მნიშვნელოვანი ნაწილი -"თავისთვის ან სხვისთვის რაიმე გამორჩენის ან უპირატესობის მისაღებად", სასამართლომ ვერც ერთ ეტაპზე ვერ დაადასტურა. მიუხედავად ამისა კი მაინც გამამტყუნებელი განაჩენი გამოიტანა.

ხიდაშელის აზრით, იმ შემთხვევაში, თუ გამორჩენა არ არის დადასტურებული, სასამართლოს გადაწყვეტილება არასწორია:

"კარგია რომ კაბელების საქმის ბრალდებულები საპატიმროს 2 თვეში დატოვებენ! ცუდია:

  1. სასამართლომ ნამუსი მოწმინდა პროკურატურას. ვერ გაბედა გამამართლებელი განაჩენი და ფორმული პროცედურით თავიდან აიცილა ხანგრძლივი პატიმრობა;
  2. სასამართლომ კიდევ ერთელ უარი თქვა კანონის დაცვაზე. 332-ე მუხლისთვის აუცილებელი, სავალდებულო პირობაა "თავისთვის ან სხვისთვის რაიმე გამორჩენის ან უპირატესობის მისაღებად". ამ უმთავრესი პირობის დადასტურება ვერც ერთ ეტაპზე ვერ შეძლო სასამართლომ. მიუხედავად ამის, მაინც გამამტყუნებელი განაჩენი გამოიტანა.
  3. მითვისებას და გაფლანგვას, სამსახურებრივი უფლებამოსილების ბოროტად გამოყენებით თუ შეცვლი ეს არ შველის მოსამართლეს იმ შემთხვევაში თუ გამორჩენა არ არის დადასტურებული. მაინც სჭირდება ამის უტყუარად დამტკიცება ბრალდებას.
  4. არადა როგორ ჭირდება ჩვენს სასამართლოს მცირედი გამბედაობა, რომ თავი დაიმკვიდროს, წელში გაიმართოს, ფუნქცია შეასრულოს.
    სამწუხაროა. ძალიან სამწუხარო."

სასამართლომ ე.წ. კაბელების საქმის მსჯავრდებულების ბრალდება გადააკვალიფიცირა და მათ საბუჯეტო სახსრების გაფლანგვის ნაცვლად სამსახურეობრივი უფლებამოსილების გადამეტებაში (სსკ-ის 332 მუხლი) დასდო ბრალი. თავდაცვის სამინისტროს 5 ყოფილი მაღალჩინოსნის შვიდწლიანი საპატიმრო სასჯელი შეიცვალა 1,5-წლიანი პატიმრობით. ისინი საპატიმროს ორ თვეში დატოვებენ.