ნაციონალური მოძრაობის ერთ-ერთი ლიდერი, ლევან ხაბეიშვილი ამბობს, რომ აფრიკის დასახლებაში არანაირი კომუნიკაცია არ არის და გავრცელებული ინფორმაცია, რომ აქ ადამიანები აგარაკებს იშენებენ, ვერ იქნება სწორი.

"სრული იდიოტი და გულისამრევი ადამიანი უნდა იყო, რომ თქვა, რომ აფრიკის ამ დასახლებაში, სადაც არანაირი კომუნიკაცია არ არის, არც ასფალტი არ არის, არც წყალი არ არის, არც კანალიზაცია არ არის, არაფერი იქ არ არის. განათების ბოძებიც კი არ არის და ამ დროს თქვა, რომ იქ ადამიანები აგარაკს აშენებენ. კალაძეს მილანის მერი ჰგონია ალბათ თავი და ამიტომ ფიქრობს, რომ ყველა ადამიანი მდიდარია და ყველას შესაძლებლობა აქვს. თურმე ეს გაჭირვებული მოქალაქეები აგარაკებს იშენებენ აფრიკაში, სრული სიგიჟეა", — განაცხადა ხაბეიშვილმა ფორმულას ეთერში.

აფრიკის დასახლებაში მიმდინარე მოვლენებზე საუბრისას, თბილისის მერმა, კახა კალაძემ განაცხადა, იქ არავინ ცხოვრობს და მოსახლეობა, რომელიც უნებართვოდ აშენებული შენობა-ნაგებობების დემონტაჟს აპროტესტებს, რეგიონებში სხვა ქონებაც აქვთ.

15 დეკემბერს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

გაიგეთ მეტი: