შინაგან საქმეთა სამინისტროს ცნობით, სამართალდამცავებმა წარსულში ნასამართლევი ორი პირი, ქურდული სამყაროს წევრობის ბრალდებით, თბილისში დააკავეს.

უწყება გავრცელებულ განცხადებაში წერს, რომ ერთ-ერთი დაკავებული შპს კაპიტალ გრუპის კუთვნილი მიკროავტობუსის მოიჯარე მძღოლს თბილისში, ერთ-ერთ სამარშრუტო ხაზზე მუშაობის სანაცვლოდ, გარკვეულ თანხას სისტემატურად სძალავდა.

გამოძიების თანახმად, მიმდინარე წლის იანვარში, მძღოლმა მისთვის თანხის მიცემა შეწყვიტა, რის გამოც, დავის გადაწყვეტის მიზნით, ბრალდებული ქურდული სამყაროს კიდევ ერთ წევრს დაუკავშირდა და დახმარება სთხოვა.

გამოძიების ვერსიით, მიმდინარე წლის 17 იანვარს, ბრალდებულებმა სარგებლის მიღებისა და დაზარალებულზე ზეგავლენის მოხდენის მიზნით, თბილისში, გლდანის რაიონში მდებარე ერთ-ერთ საცხოვრებელ სახლში ე.წ. ქურდული გარჩევა მოაწყვეს, Skype-ის მეშვეობით დაუკავშირდნენ საზღვარგარეთ მყოფ ქართველ ე.წ. კანონიერ ქურდს - ლ. ხ.-ს, რომელმაც მხარეების მოსმენის შემდეგ გადაწყვიტა, რომ ე.წ. ქურდული კანონების თანახმად, მძღოლს კვლავ უნდა ეხადა გარკვეული თანხა.

გამოძიება საქართველოს სსკ-ის 223-ე პრიმა მუხლის 1-ლი ნაწილით, ქურდული სამყაროს წევრობის ფაქტზე მიმდინარეობს.