Pornhub-მა თავისი პლატფორმიდან შეუმოწმებელი კონტენტი მთლიანად წაშალა.

ეს "დიდი წმენდა" მას შემდეგ მოხდა, რაც New York Times-ის გამოძიების შემდეგ გაირკვა, რომ ზრდასრულთა გასართობი პოპულარული ვებსაიტი თავის პლატფორმაზე მომხმარებლების მიერ ატვირთულ ისეთ სცენებსაც მოიცავდა, რომლებიც ნებართვის გარეშე იყო გავრცელებული ან ბავშვებისადმი სექსუალური ძალადობის სცენებს შეიცავდა.

აქტივისტები დიდი ხნის განმავლობაში ითხოვდნენ Pornhub-ის ბიზნეს-მოდელის შეცვლას იმ მიზეზით, რომ ის საკმარისად არსებითად არ ამოწმებდა ატვირთულ კონტენტს იმაში დასარწმუნებლად, რომ ვიდეოები ნამდვილად კონსენსუალური იყო. უკანონო კონტენტის არსებობის ამ სერიოზული ბრალდების გამო Visa-მ და Mastercard-მა Pornhub-თან საქმიანი ურთიერთობების გამოძიებაც დაიწყეს.

Pornhub-მა, რომელსაც ყოველდღიურად 100 მილიონი მომხმარებელი სტუმრობს, უარყო ეს სისტემური პრობლემა, თითქოს პლატფორმაზე ბავშვებისადმი სექსუალური ძალადობის ამსახველი ვიდეოები იყო განთავსებული, და New York Times-ის ბრალდებებს "უპასუხისმგებლო და აღმაშფოთებლად ცრუ" უწოდა.

მიუხედავად ამისა, წინა კვირაში Pornhub-მა წაშალა ყველა ის ვიდეო, რომელიც მისი ოფიციალური კონტენტ-პარტნიორებისა და სამოდელო პროგრამის მონაწილეების ატვირთული არ იყო, რის გამოც პლატფორმაზე არსებული ვიდეოების რაოდენობა მნიშვნელოვნად შემცირდა. Pornhub-ის 13,5-მილიონიანი ვიდეოარქივი 4,7 მილიონ ვიდეომდე შემცირდა, თუმცა ოფიციალურად ჯერ კიდევ არ თქმულა, თუ რამდენად დიდი რაოდენობის კონტენტი წაიშალა პლატფორმიდან. ყველა წაშლილი ვიდეო ახლა ჩანაცვლებულია შეტყობინებით, რომელიც იუწყება: "მონიშნულია შემოწმებისთვის ჩვენი ნდობისა და უსაფრთხოების პოლიტიკის მიხედვით".

წესების ბოლოდროინდელ ცვლილებასთან ერთად, რომელიც შეუმოწმებელ მომხმარებლებს პლატფორმაზე კონტენტის ატვირთვისა და ჩამოტვირთვისგან ზღუდავს, Pornhub აპირებს, 2021 წლის დასაწყისში ვერიფიკაციის ახალი პროცესი შემოიღოს, რომელიც მოდერაციას ახალ, გაძლიერებულ შრეს შემატებს.

"შეუმოწმებელი ამტვირთავების აკრძალვასთან ერთად ჩვენ ასევე შევზღუდეთ აქამდე ატვირთული ყველა კონტენტი, რომელიც კონტენტ-პარტნიორებისა და სამოდელო პროგრამის მონაწილეების მიერ არ იყო ატვირთული. ეს ნიშნავს, რომ ახლა Pornhub-ის კონტენტის თითოეული ერთეული შემოწმებული ამტვირთავების განთავსებულია — ეს ის მიდგომაა, რომელიც ჯერ კიდევ არ შემოუღიათ ისეთ პლატფორმებს, როგორებიცაა Facebook, Instagram, TikTok, YouTube, Snapchat და Twitter", — წერია Pornhub-ის ოფიციალურ ბლოგზე.

განახლება: Pornhub-მა კონტენტის წაშლა მოგვიანებითაც გააგრძელა და ამ დროისთვის ვიდეოების რაოდენობა 2,9 მილიონამდეა შემცირებული.