ქართული ოცნების ერთ-ერთი წევრი, ლადო კახაძე ფიქრობს, რომ ე.წ. ვარდების რევოლუცია რუსეთმა მოაწყო. ამის შესახებ მან მე-10 მოწვევის პარლამენტის სხდომის დასრულების შემდეგ მთავარ არხთან განაცხადა.

"2003 წლიდან ვამტკიცებ, რომ რუსებმა გააკეთეს 2003 წლის ე.წ ვარდების რევოლუცია", — ამბობს კახაძე.

11 დეკემბერს პარლამენტში მე-10 მოწვევის სხდომა გაიმართა, რომელშიც მხოლოდ ქართული ოცნება იღებდა მონაწილეობას. სხდომაზე, ასევე, მიწვეულები იყვნენ: პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრებოდა.

2003 წლის 23 ნოემბერს, სხდომის მიმდინარეობისას, პარლამენტში შეიჭრნენ საპროტესტო აქციის მონაწილეები, რომლებმაც სხდომათა დარბაზი დაიკავეს და პრეზიდენტ ედუარდ შევარდნაძის გადადგომა მოითხოვეს. პრეზიდენტი გადადგა, ხოლო რამდენიმე თვეში გამართულ საპრეზიდენტო არჩევნებში დამაჯერებლად გაიმარჯვა ერთიანი ნაციონალური მოძრაობის ლიდერმა მიხეილ სააკაშვილმა.

რევოლუციას წინ უძღოდა 2003 წლის საპარლამენტო არჩევნების შედეგები, რომელიც ფართოდ გავრცელებული აზრით, სახელისუფლებო პარტიების, საქართველოს მოქალაქეთა კავშირის და აღორძინების კავშირის სასარგებლოდ იყო გაყალბებული. ეს შეფასება დაადასტურა განსხვავებებმა არჩევნების წინასწარ შედეგებსა და ეგზიტპოლებს, აგრეთვე, ხმების პარალელური დათვლის შედეგებს შორის.